порлумон
ДУРӮҒНАВИСОНРО ҲАМ МЕСАНҶАНД
Дар ҷаласаи навбатии Маҷлиси намояндагон ба як қатор қонунҳои ҷумҳурӣ тағйиру иловаҳо ворид шуданд. Юсуфиён Ҷамшед, муовини аввали раиси Бонки миллии Тоҷикистон, зимни ворид намудани иловаҳо ба Қонуни Ҷумҳурии Тоҷикистон «Дар бораи фаъолияти аудиторӣ» иброз дошт, ки Тоҷикистон узви гурӯҳи АврОсиё мебошад. Он яке аз ташкилотҳои минтақавии Гурӯҳи татбиқи чораҳои молиявии муқовимат ба шустани пул (ФАТФ) буда, фаъолияти худро ба ҳамоҳангсозии низомҳои муқовимат ба қонунигардонии даромадҳои бо роҳи ҷиноят бадастоварда ва маблағгузории терроризм равона намудааст.
Аз соли 2007 зимни баҳогузории низоми Ҷумҳурии Тоҷикистон дар ин соҳа татбиқи чораҳои молиявии муқовимат ба шустани пул аз ҷониби Бонки ҷаҳонӣ ва Хазинаи байналмилалии асъор ҳамкориро бо ФАТФ оғоз намудааст.
Ин «Нақшаи чорабиниҳо оид ба мутобиқгардонии қонунигардонии Ҷумҳурии Тоҷикистон ба тавсияҳои ФАТФ» тайёр карда шуд, ки аз ҷониби Сарвазири Ҷумҳурии Тоҷикистон 11 июни соли 2011 тасдиқ гардид. Лоиҳаи қонуни мазкур ҷиҳати иҷрои банди 5-уми ин нақша таҳия шуда, бо дарназардошти пешниҳоди ФАТФ ва талаботи созишномаҳои байналмилалӣ омода гаштааст.
Талаботи тавсияи 23 - юми ФАТФ ба он равона шудааст, ки ташкилотҳои аудиторӣ ва аудиторони инфиродӣ уҳдадор карда мешаванд, дар бораи ҳама гуна аҳд ва амалиётҳои шубҳанок, ки дар натиҷаи фаъолияти аудиторӣ ошкор шудаанд, ба мақомоти ваколатдори муқовимат ба қонунигардонии (расмикунонии) даромадҳои бо роҳи ҷиноят бадастоварда ва маблағгузории терроризм хабар диҳанд. Қабули ин лоиҳаи қонун имкон медиҳад, ки Ҷумҳурии Тоҷикистон баҳогузории худро беҳтар гардонда, имконияти аз реҷаи мониторинги «қатъӣ» ба муқаррарӣ гузаштанро муҳайё намояд.
Грез Қосимов, муовини якуми директори Агентии хизмати давлатии назди Президенти Ҷумҳурии Тоҷикистон, вобаста ба ворид намудани тағйиру иловаҳо ба Қонуни Ҷумҳурии Тоҷикистон «Дар бораи хизмати давлатӣ» гуфт, ки он ба мақсади боз ҳам ташаккул додани низоми хизмати давлатӣ, татбиқи талаботи Стратегияи муқовимат бо коррупсия дар Ҷумҳурии Тоҷикистон барои солҳои 2013 - 2020, аз байн бурдани баъзе номуайяниҳо дар қонунгузории хизмати давлатӣ таҳия шудааст.
Дар лоиҳаи қонун ба 10 модда тағйиру илова ворид карда шуд. Грез Қосимов иброз дошт, ки ба қонун илова намудани моддаи нав 171 «Санҷиши махсус дар хизмати давлатӣ» пешбинӣ шудааст, ки ҳадаф иҷрои Нақшаи чорабиниҳо оид ба татбиқи Стратегияи муқовимат бо коррупсия дар Ҷумҳурии Тоҷикистон барои солҳои 2013 - 2020, иҷрои тавсияҳои Созмони ҳамкории иқтисодӣ ва рушд (СҲИР) барои Тоҷикистон аст.
Санҷиши махсус танҳо дар он сурат гузаронда мешавад, ки агар хизматчии давлатӣ дар эъломияҳо дар бораи даромад ва вазъи молумулкиаш маълумоти бардурӯғ дода, он ошкор шуда бошад. Санҷиши махсус аз ҷониби мақомоти дахлдори давлатӣ гузаронда мешавад.
Ба қисми 1 моддаи 32 низ ба хотири баланд бардоштани масъулияти хизматчиёни давлатӣ, пешгирии амалҳои коррупсионӣ ва дар робита татбиқ намудани муҷозоти интизомӣ барои риоя накардани талаботи Кодекси одоби хизматчии давлатии Ҷумҳурии Тоҷикистон ва кодексҳои соҳавии одоби хизматчии давлатӣ, роҳ надодан ба бархурди манфиатҳо ҳангоми адои хизмати давлатӣ ва ё дигар кирдорҳои бавуҷудоварандаи коррупсия, ки дорои аломатҳои ҳуқуқвайронкунии маъмурӣ ва ҷиноят мебошанд, илова пешниҳод гардид.
Тағйироти ба моддаҳои 39 ва 41 воридшуда барои мутобиқ намудани меъёрҳои амалкунанда ба қонунгузории меҳнат ва нафақа мебошад.
Мунаввари САФАР,
«Ҷумҳурият»
Баёни ақида (0) Санаи нашр: 3.06.2014 №: 104 Мутолиа карданд: 1460
