маориф
Муроди мо танқиди
воқеъбинона аст
Ба тасвиб расидани Фармони Президенти Ҷумҳурии Тоҷикистон «Дар бораи вокуниши шахсони мансабдор ба маводҳои танқидӣ ва таҳлилии воситаҳои ахбори омма» бисёр зарур, муфид ва талаботи давр буд. Албатта, пеш аз ин ҳам мо ба ҳар маводи танқидӣ, ки воқеъбинона ва барои пешрафти кор чоп мешуд, назари нек доштем ва посух мегуфтем. Аммо минбаъд ин фармон вазифадорамон месозад, ки сари вақт, дуруст, бо эҳсоси масъулияти бузург ба матлабҳои танқидӣ ва таҳлилӣ вокуниш нишон диҳем.
Дар ҳақиқат, ҳар маводи танқидӣ ва таҳлилӣ таконе дар пешрафти кор хоҳад шуд. Мо шод мегардем ва нишони пешрафт медонем, вақте ки хабарнигорон, мардум нисбат ба фаъолияти маориф бо таҳлилу танқид андешаҳои ҷолибу муфид баён медоранд. Воқеан, рушду такомули соҳа ба ҳама вобастагӣ дорад. Мо дар алоҳидагӣ аз ӯҳдаи иҷрои пурраи ислоҳоти маориф баромада наметавонем.
Вобаста ба иҷрои фармони мазкур мехостам, ки рӯзноманигорон соҳаи маорифро барои фаъолияташон дуруст биомӯзанд, то минбаъд ҳамкории созанда ва самаранок ба вуҷуд биёяд.
Инчунин дар доираи имконоти кишвар бояд пешрафти соҳаро хостор бошем. Яъне мо яку якбора дар маориф барои расидан ба мамолики шинохтаи ҷаҳонӣ инқилоб карда наметавонем.
Ғайр аз ин мехостам, чи тавре ки дар қисмати 3-юми фармон омада: «Роҳбарони воситаҳои ахбори омма:
-таъмини воқеият ва таъсирбахшии маводҳои танқидӣ ва таҳлилиро вазифаи асосии фаъолияти хеш ҳисобанд».
Муроди мо аз ин таъкид он аст, ки ҳама гуна танқид воқеъбинона ва ба хотири ислоҳи камбудиҳову рушду такомули соҳа бошад, на муғризона.
Бовар дорам, ки барои иҷрои фармони мазкур робитаҳои мо бо воситаҳои ахбори омма бештару беҳтар мегардад ва баҳри созандагӣ равона мешавад.
Абдуҷаббор РАҲМОНОВ,
вазири маорифи ҷумҳурӣ
Баёни ақида (0) Санаи нашр: №: Мутолиа карданд: 6533
