маориф
ЛАГЕРҲО ДАР КАДОМ ВАЗЪАНД?
Шуъбаи маорифи мақомоти иҷроияи маҳаллии ҳокимияти давлатии ноҳияи Ашт ба мақолаи «Лагерҳо дар кадом вазъанд?», «Ҷумҳурият» аз 10 июни соли 2014, рақами 109 посух медиҳад, ки бо мақсади амалӣ намудани Қарори Ҳукумати Ҷумҳурии Тоҷикистон аз 5 декабри соли 2013, рақами 558 «Дар бораи ташкили истироҳати тобистонаи кӯдакон ва наврасон дар соли 2014», фармоиши вазири маориф ва илми Ҷумҳурии Тоҷикистон аз 22 январи соли 2014, рақами 149, қарори раиси вилоят аз 13 феврали соли 2014, рақами 71, қарори раиси ноҳия аз 12 марти соли 2014, рақами 182 ва фармоиши мудири шуъбаи маориф, рақами 9/2 аз 17 марти соли 2014 ва нақша - чорабинии мушаххаси шуъбаи маориф як қатор чорабиниҳоро амалӣ намудааст.
Дар ноҳия як лагери беруназшаҳрӣ дар деҳаи Бободархони Ҷамоати деҳоти Понғоз мавҷуд буда, ҳар сол аз 60 то 80 нафар хонандагон дар он ба истироҳат фаро гирифта мешаванд.
Бо мақсади боз ҳам беҳтар намудани шароити лагери беруназшаҳрии Бободархон, таъмиру тармим ва таҷҳизонидани он корҳои таъмириву ободонӣ анҷом ёфтаанд. Дар боғи лагер зиёда аз 100 ниҳоли боровар шинонда шуд. Айни замон басти якуми лагер бо фарогирии 30 нафар хонандагон оғоз гардидааст.
Барои истироҳати хонандагон дар соли ҷорӣ ҳамаи шароитҳо муҳайёанд. Инчунин дар асоси қарорҳои ташкилотҳои дахлдор оид ба истироҳати хонандагон дар муассисаҳои таълимии ноҳия 16 лагери наздимактабии солимгардонӣ, 1 лагери варзишӣ ва 2 лагери меҳнатӣ – истироҳатӣ дар назди мактабҳои рақамҳои 31 ва 28 ташкил гардида, дар онҳо зиёда аз 600 нафар хонандагон фаро гирифта мешаванд.
Федератсияи иттифоқҳои касабаи вилояти Суғд барои ободонии истироҳатгоҳи беруназшаҳрии Бободархон 5000 сомонӣ ҷудо кард.
Б. ТУРСУНОВ,
мудири шуъбаи маорифи ноҳияи Ашт
Баёни ақида (0) Санаи нашр: 3.07.2014 №: 126 Мутолиа карданд: 1580
