номаҳо
Инсофу диёнат куҷост?
Ҳамасола дар моҳи шарифи Рамазон бисёре аз нархҳои маводи ғизоиро сунъӣ ба боло мебаранд, хоса нархҳои орду гӯштро. Пас аз он дигар ҳеҷ онро поён намефароранд. Агар мардум аз ин амали номатлуб борҳо ба дод омадаанд, ҳеҷ асари неке ба бор наовардааст. Тоҷирони кишвари мо аз рӯи масали «гӯр сӯзаду дег ҷӯшад» амал мекарданду мекунанд. Нафъи дунёро беҳ аз охират донистаанд.
Ҳамин тавр, мо дигар ба болоравии нархҳо дар моҳи шарифи Рамазон одат кардаем. Аммо бояд ёдовар шуд, ки ҳеҷ сол дар ин моҳи муборак нархи сабзавот, хоса кабудиро қимат наменамуданд. Пас имсол чӣ сол аст? Чӣ паёмад дорад? Дар муддати як моҳ бо чанд дирами изофа метавон сарватманд шуд?
Пештар ноогоҳӣ барои ин қабил савдогарон баҳонае хуб буд. Ҳоло чӣ? Дар сурате аксари онҳо барои тиҷорату сафар ними дунёро дидаанд. Чаро аз мардуми дигар кишварҳо тиҷорату диёнат наомӯхтаанд?
Медонам, ки пурсишҳо бе ҷавоби мусбат мемонанд, аммо ман масъулам дод бихоҳам ва ин беинсофонро бар сари инсоф даъват намоям.
С. ҚУРБОНОВА, ш. Душанбе
Баёни ақида (0) Санаи нашр: 4.07.2014 №: 127 Мутолиа карданд: 1306
