маориф
ПЕШАИ ҒАЙРИИНТИЗОР
Интихоб амал асту орзу хаёл. Амал маънии ҳаёт ва асли касб аст. Амал аст, ки инсонро ба касб пайванди якумрӣ мебахшад. Кам нест, касбҳое, ки шахс ҳангоми интихоб аз онҳо сарфи назар карда буд, аммо қисмат ин саркаширо рад кард.
Хотима Касирова ҳеҷ гоҳ интизор набуд, ки фаъолияти касбии минбаъдааш ба таълиму тарбияи кӯдакони маъюб, ношунаво ва нобино равона мегардад, ҳамон қишре, ки эҳтиёҷ ба дастгирии бештар дорад. Ӯ аз соли 2011 то ба ҳол дар вазифаи директори мактаб – интернати ҷумҳуриявии кӯдакони кари ноҳияи Рӯдакӣ фаъолият дорад. Дар ин муассиса ҳоло 275 хонанда ба таълиму тарбия фаро гирифта шудаанд.
Мегӯяд, ки аввалин иқдоми анҷомдодааш дар ин муассиса аз байн бурдани пардохти маблағ аз падару модарони хонандагони маъюб буд.
- Қаблан ҳар моҳ аз волидайн 30 сомонӣ «барои нигоҳубини хуб» ҷамъ мекарданд. Дар ҷаласаи аввалин бо иштироки омӯзгорон ва волидайни хонандагон, ин «ғамхории пулӣ»-ро қатъ кардем. Баръакс мо бояд ба ин қишри ҷомеа хайр намоем, зеро онҳо маъюбанд. Маъюбон зери сиёсати иҷтимоии давлат қарор гирифтаанд ва ҳеҷ нафар суистифода аз ҳуқуқҳои маъюбии онҳоро надорад. Вазифаи инсониву имонӣ ва қонуниву иҷтимоии мо кумак ба онҳост. Пешниҳод шуд, ки агар минбаъд омӯзгор, мураббия аз волидайн барои таълими хонандагон маблағе мегирад, аз рӯи чунин кирдораш ба мақомоти салоҳиятдор муроҷиат карда мешавад. Илова бар ин волидайн ҳам агар дар рӯзи зодрӯзи фарзанд хоҳиши тақдими ҳадяе дошта бошанд, иҷрои он бо иҷозати роҳбарият дар доираи ҳамсинфон сурат мегирад.
Муаллимае байни шогирдон бо табассум суҳбат мекард, ҳатто давоми ним соати мушоҳидаи мо номи чанд нафар шогирдонро гирифт ва аҳволпурсӣ кард. Фикр кардем, ки омӯзгори ҷавон ё коромӯз аст, аммо аз тарзи муошират бо хонандагон бардошт дигар буд.
- Табиист, ки шогирдони мо қобилияти шунидан ва гуфтан надоранд. Бе иҷозат ё бесарпараст ба кӯча бароянд, мумкин аст дучори мушкилот гарданд. Ҳатто шабона низ аз онҳо дар хавотирам. Ҳамеша телефони ҳамроҳ ва симин дар хонаам фаъол аст. Вақте садои телефон баланд мешавад, аввал шумораи воридотиро мебинам. Агар аз мактаб ё ҳамкорон бошад, хавотир мешавам... На танҳо назди волидайн ва Ҳукумати ҷумҳурӣ, ки сарпарасти бевоситаи онҳост, ҷавобгӯем. Ин аст рисолати ҳар лаҳзавии мо дар ҳаёту кор. Боз лаҳзае ҳаст, ки хавотир ва заҷри моро кам мекунад, ин ба камол расидан ва соҳибкасб шудани онҳо.
Воқеан, таълиму тарбияи онҳое, ки намешунаванду ҳарф зада наметавонанд, нисбат ба онҳое, ки мешунаванду ҳарф мезананд, сангин аст. Дар баробари нуқсони табиӣ ду омили муҳим, назорат, муошират ва таъмини шароити моддиву маънавии ин атфол дар мактаб барои омӯзгорон масъулияти бештар талаб мекунад.
Ба духтарон касбҳои дӯзандагӣ, пазандагӣ, гулдӯзӣ ва ба писарон сартарошӣ, кулолгарӣ, мӯзадӯзӣ, кандакорӣ ва ғайраро меомӯзонанд. Хатм-кунандагоне, ки қобилияти хуб доранд, метавонанд таҳсилро дар факултаи сурдопедагогии Донишгоҳи давлатии омӯзгории Тоҷикистон ба номи Садриддин Айнӣ идома дода, омӯзгори касбӣ шаванд.
-Барномаи «Дастони гӯё»-ро таҳия кардем, ки хонандагон бо даст-ишора суҳбат карданд. Кӯшиш кардем, ки ҳунару истеъдоди хонандагон ба маърази тамошо гузошта шавад. Барнома 1-июн дар Рӯзи байналмилалии ҳифзи кӯдакон пешниҳод гашт.
Хотима Касирова аз соли 1999 омӯзгор аст. Фаъолияти кориро дар ноҳияи Восеъ шурӯъ кардааст. Ин ҷо фаъолияти педагогии худро такмил дода, ғолиби озмуни «Муаллими сол» гардид. Ин талошу қадрдониҳо азми муаллимаи ҷавонро қавитар кард. Баъдан бо назардошти лаёқату кордонӣ ӯро ба Вазорати маориф ва илм аз тариқи озмун ба кор даъват намуданд. То соли 2011-ум ба ҳайси сармутахассис дар раёсати таҳсилоти томактабӣ, миёнаи умумӣ ва таҳсилоти миёнаи касбии вазорат кор кард.
О. АБДУСАТТОР,
рӯзноманигор
Баёни ақида (0) Санаи нашр: 11.07.2014 №: 132 Мутолиа карданд: 2626
