номаҳо
Шахсони масъул
огоҳ шуданд
Мақолаи сардабири маҷаллаи «Бонувони Тоҷикистон» Ҳ. Ализода, ки бо унвони «Хатлон. Асри чанд?», ки дар рӯзномаи «Ҷумҳурият» шумораҳои 14-15 (21521-522), аз 24 январи соли 2009 чоп шудааст, дар мақомоти иҷроияи маҳаллии ҳокимияти давлатии вилояти Хатлон мавриди баррасии амиқ қарор гирифт. Бо камоли таассуф бояд зикр кард, ки нисбат ба қабули муаллифи мақола аз тарафи шахсони масъули мақомоти иҷроияи маҳаллии ҳокимияти давлатии вилоят нофаҳмӣ зоҳир гардидааст. Бинобар ин шахсони масъул огоҳ карда шуданд. Инчунин ба тамоми кормандони дастгоҳи раиси вилоят ва мақомоти иҷроияи маҳаллии ҳокимияти давлатии вилоят дастур дода шуд, ки дар оянда ҳангоми қабул ва сӯҳбат бо муроҷиаткунандагон тартиби қабулро қатъиян риоя намоянд.
Кормандони мақомот, аз раиси вилоят ва муовинони ӯ, то мудирони шӯъбаҳо, сардорони идораҳо, раисони кумита, раёсатҳо ва хизматчиёни қаторӣ водор карда шуданд, ки ҳамеша кӯшиш намоянд ашхоси муроҷиаткунандаро дар вақти муайян қабул ва барои ҳалли мушкилоташон ба онҳо кӯмак расонанд.
Бо қарори раиси вилоят ҷадвали рӯзҳои қабули шаҳрвандон аз ҷониби раис ва муовинони ӯ тасдиқ гардидааст, ки ҳоло он пурра риоя мешавад. Мавриди зикр аст, ки раиси вилоят ҳар се моҳ нишастҳои матбуотӣ доир менамояд, ки дар он намояндагони воситаҳои ахбори омма фаъолона ширкат меварзанд ва натиҷааш дар матбуот дарҷ мегардад. То имрӯз аз рӯи суолҳо, дархост ва таклифу пешниҳодҳои журналистон, ки дар ҷараёни нишастҳо баён гардидаанд, чораҳои амалӣ андешида, корҳои зиёдро ба сомон расониданд. Чунин тартиб дар оянда низ риоя хоҳад шуд.
Зарур аст тазаккур диҳем, ки проблемаҳои иҷтимоию иқтисодии вилоят хеле зиёд ва доираи корҳое, ки ҳамарӯза бояд аз тарафи роҳбарон ба ҷо оварда шаванд, басо васеъ аст. Бинобар ин як қисми вазифаҳо ба ӯҳдаи муовинони соҳавии раиси вилоят вогузор гардидаанд.
Дар хотима иттилоъ медиҳам, ки дари дафтари кории раиси вилоят ҳамеша ба рӯи намояндагони воситаҳои ахбори омма ва ҳамаи онҳое, ки бо ин ё он масъалаи муҳиму аҳамиятнок, фарогири манфиатҳои иҷтимоию иқтисодӣ ва фарҳангию маънавии вилоят нигаронида шудаанд, кушода аст.
Ғ. АВЗАЛОВ,
раиси вилояти Хатлон
Баёни ақида (0) Санаи нашр: №: Мутолиа карданд: 3436
