маориф
РАВОНШИНОСОН БА МАКТАБ ҶАЛБ МЕШАВАНД
Дар нишасти матбуотӣ сардори Раёсати маорифи вилояти Суғд Муҳаббат Бобоҷонова баён дошт, ки соли равон беш аз 106 ҳазору сад нафар хонандагон дар се баст ба истироҳат фаро гирифта мешаванд.
Ҳамчунин гуфт, ки вазъи ҷинояткорӣ миёни мактабиён кормандони соҳаро ба ташвиш андохтааст. Қонуни Ҷумҳурии Тоҷикистон «Дар бораи масъулияти падару модар дар таълиму тарбияи фарзанд» аз ҷониби волидон иҷро намешавад онҳо масъулиятро ҳамоно бар дӯши мактаб мегузоранд. Дар 5 моҳи соли равон 40 хонанда даст ба ҷиноят задааст. Ин ҳолат дар шаҳру ноҳияҳои Хуҷанд, Б. Бобоҷон Ғафуров, Исфара, Мастчоҳ, Ашт, Ҷаббор Расулов нисбатан ташвишовар мебошад.
Ҳодисаҳои худкушӣ ва суиқасд ба ҷон байни мактабхонҳо моро ҳушдор медиҳад, ки пайваста дар ин самт кор барем. Дар 5 моҳ 13 нафар ба худкушӣ даст зад. Мудирони шуъбаҳо ва раёсатҳои маорифи шаҳру навоҳӣ супориш гирифтанд, ки дар соли нави хониш омӯзгорони фанни равоншиносиро ба мактабҳо ҷалб намоянд.
Гулҷаҳон ТУРСУНЗОДА
Баёни ақида (0) Санаи нашр: 15.07.2014 №: 134 Мутолиа карданд: 1386
