номаҳо
Вазифаи бачаҳо говчаронист?
Омӯзгорон дар маҷлисҳои умумии падару модарон ба диққати онҳо мерасонанд, ки «таълиму тарбия вазифаи бузургест. Мо бояд дар якҷоягӣ фарзандони шуморо тавре таълиму тарбия бидиҳем, ки дар оянда номбардори давлату миллатамон бошанд». Падару модарон «оре» гӯён тасдиқ мекунанд, аммо таътили тобистона, ки сар шуд, ҳамаро фаромӯш менамоянд. Дар ин фасл барои фарзандон, бахусус бачаҳо, машғулият меёбанд: говчаронӣ, алафдаравӣ, савдогарӣ ё шуғли дигар. Ҳадди ақал як моҳи тобистонро барои тамрини зеҳнашон ва ё барои истироҳат намебахшанд. Шояд говчаронӣ ё молбонӣ ҳамчун шуғли наврасӣ ва ҷузъи машғулияти оилавӣ бошад, аммо дар зери офтоби тафсон ва даштҳо соатҳо гаштугузор кардан ба саломатии онҳо таъсири манфӣ мерасонад.
Омӯзгор мисли боғбон аст, ки барои ниҳолони бо умед ба замин шинондааш тамоми заҳматҳоро мекашад, то самараи хуб ба даст орад. Кӯдакон мисли ниҳолони наврустаанд, ки омӯзгорон бо муҳаббату самимият парвариш мекунанд. Парвариши ана ҳамин ниҳолони навруста дар таътили тобистона бар зиммаи падару модарон аст. Падару модарон ба онҳо чӣ гуна таълиму тарбия медиҳанд?
Ҷавоби ин суолро мо он вақт мефаҳмем, ки шогирдонамон пас аз таътили тобистона ба муассисаи таълимӣ меоянд. Аз бемасъулиятии баъзе аз падару модарон саводи азхудкардаи шогирдон коста мегардад. Акнун омӯзгор бояд, чанд моҳи дигар ранҷ кашад, то ҳушу ёди шогирдро ба дарс ва омӯзиш баргардонад. Ҳоло, ки таътили тобистона аст, ростӣ, барои баъзе аз кӯдаконе, ки дар деҳа зиндагӣ мекунанд, хавотирам. Ҳар рӯз: аз субҳ то шом як вазифаро иҷро мекунанд. Саҳарии барвақт говҳоро ба чарогоҳ мебароранду бегоҳ меоранд.
Ҳайбӣ МАҚСУДОВА, муаллима, ноҳияи Рӯдакӣ
Баёни ақида (0) Санаи нашр: 26.07.2014 №: 143 Мутолиа карданд: 1303
