номаҳо
БӮЙИ БАДИ КОРХОНА
Фасли гармосту гирду атрофи моро чангу ғубор фаро гирифтааст. Дар баробари ин, фаъолияти доимии корхонаву фабрикаҳо низ ҳавои атмосфераро, ки инсон аз он нафас мекашад, ифлос мекунад. Заҳролудшавии манбаъҳои обӣ ва хок бошад, таъсири фаъолияти инсон буда, ҳангоми риоя накардани меъёрҳои бехатарӣ ба амал меояд. Новобаста ба он ки дар ҷумҳурӣ солҳои охир бемориҳои саратони меъда, рӯда, ҷигар ва сактаи дил дар ҳоли афзоишанд, беназоратии мутахассисони соҳаи ҳифзи муҳити зист ба манбаъҳои обию ҳавоӣ ва заҳрхимикатҳо дида мешавад.
Корхонаи истеҳсоли пӯст дар шаҳри Душанбе ҳамарӯза фаъолият мекунад. Азбаски он қоидаҳои экологиро риоя намекунад, бо коркарди пӯсту дигар ашёи хом, ҳавои дохили шаҳрро заҳролуд месозад. Масалан, 24 августи соли 2011 6 нафар корманди корхона ҳангоми кор заҳролуд шуда фавтиданд. Имрӯз бошад, истиқоматкунандагони ноҳияи Фирдавсӣ аз бӯйи бади ин корхона ба дод омадаанд. Онҳо наметавонанд дар берун ҳавои тоза нафас гиранд. Ҳатто шомгоҳон дару тирезаи хонаҳояшонро мепӯшанд.
Ба гуфтаи истиқоматкунандагони ноҳия, бо вуҷуди ба масъулони соҳа муроҷиату шикоят кардан мушкили ҷойдошта ҳалли худро наёфта истодааст. Онҳо бар инанд, ки ба фаъолияти корхона муқобил нестанд, ба ғайр аз бӯйи бадаш.
Чаро роҳбарони ин корхона воқеиятро нодида мегиранд ва бо тақдири одамон бозӣ мекунанд?
Фирӯза НОРБУТАЕВА,
рӯзноманигор
Баёни ақида (0) Санаи нашр: 5.09.2014 №: 174 Мутолиа карданд: 1300
