маориф
«БА ИМДОДИ ОМӮЗГОР КӢ МЕРАСАД?»
Ҷавоб ба мақолаи Давлатбеки Каримзод,
рӯзномаи “Ҷумҳурият” (17 апрели соли 2014, №71 (22376)
Агар омӯзгори муассисаи таҳсилоти миёнаи умумии № 29-и ноҳияи Ҷалолиддини Румӣ Мирзоева Сафармо бо ҷойи кор ё соати дарсӣ таъмин намебуд, аз ҷониби Вазорати маориф ва илми Ҷумҳурии Тоҷикистон бо ҷойи кор ва соати дарсӣ пурра таъмин карда мешуд. Масъалаи бо замини наздиҳавлӣ ё манзили истиқоматӣ таъмин намудани омӯзгорон аз тарафи мақомоти иҷроияи маҳаллӣ амалӣ мешавад.
Дар иртибот ба ин, бояд иттилоъ дод, ки дар ҳамкорӣ бо мақомоти иҷроияи маҳаллии ҳокимияти давлатии шаҳру ноҳияҳо ҷиҳати татбиқи Қарори Ҳукумати Ҷумҳурии Тоҷикистон аз 03.05.2006, №197 «Дар бораи муқаррар намудани имтиёзҳо ба омӯзгорони ҷавон» ба ҳолати моҳи июли соли 2014 дар ҷумҳурӣ 1804 нафар мутахассисони ҷавон бо қитъаи замини наздиҳавлигӣ барои сохтани хонаи истиқоматӣ (ВМКБ - 12 нафар, Хатлон - 817 нафар, Суғд - 663 нафар, Душанбе-3 нафар, НТҶ-309 нафар), бо қитъаи замин барои боғдорӣ ва полезкорӣ 420 нафар (Хатлон -179 нафар, Суғд - 220 нафар, Душанбе - 4 нафар, НТҶ - 17 нафар) ва бо қарзи имтиёзнок 563 нафар (ВМКБ - 53 нафар, Хатлон - 151 нафар, Суғд - 237 нафар, Душанбе - 7 нафар, НТҶ - 115 нафар) таъмин карда шуданд. Дар маҷмӯъ, 2787 нафар мутахассиси ҷавон бо имтиёзҳои муқарраргардида таъмин шудааст, ки он 13,5 %-ро ташкил медиҳад.
Таъкид бояд кард, ки қарори зикршуда танҳо нисбат ба омӯзгорони ҷавони собиқаи кории то сесоладошта амалӣ карда мешавад.
Масъалаи таъмини вазъи иҷтимоии омӯзгорон бояд аз ҷониби мақомоти иҷроияи маҳаллӣ ба нақша гирифта шуда, ҷиҳати ҳарчи бештар ҷалб намудани омӯзгорон чораҳои амалӣ андешида шавад. Ҳол он ки имрӯзҳо дар муассисаҳои таълимии ноҳияи Ҷалолиддини Румӣ вазъи норасоии кадрҳои омӯзгорӣ баръало эҳсос мешавад.
Ҳокимхон ВАЛИЕВ,
сардори раёсати кадрҳо ва корҳои
махсуси Вазорати маориф ва илми ҷумҳурӣ
Баёни ақида (0) Санаи нашр: 5.09.2014 №: 174 Мутолиа карданд: 1397
