номаҳо
«Адад»-и бисёр ба кӣ даркор?
Вақтҳои охир истифодаи ин калима дар забони мо хеле серистеъмол гардидаасту онро бемавриду аз ҳад зиёд ва ноҷо истифода мебаранд. Истифодаи нодурусти «адад» аз минбарҳо ва ҳатто дар гуфтугӯи байни одамон низ беш аз пеш садо дода истодааст.
Барои чӣ имрӯз бисёриҳо тӯтивор «4 адад китоб, 10 адад дарахт, 7 адад себ, 14 адад мактаб, 3 адад қонуншиканӣ, 6 адад худкушӣ, 2 адад гӯсфанд, 5 адад мӯза, 9 адад дуздӣ, 7 адад сӯхтор» ва ғайраю ҳоказо мегӯянду менависанд ва касеро ба ин ғалатнависию хатогӯӣ коре нест?
Ҳол он ки дар забони адабии тоҷикӣ барои ифодаи ин ҳама шумораҳо калимаҳои алоҳида мавҷуданд, ки дар мавридаш истифода гарданд, хубтар мебуд. Аз қабили нусха- барои китобу дафтар, дигар асноди навишта ва чопшуда, бех - воҳиди ҳисоби ниҳолу растанӣ ва дарахтон, дона - барои нишон додани шумори меваю сабзавот, зироатҳои полезӣ, сар- барои аниқ нишон додани шумори асп, хар, дигар чорвою паранда, ҷуфт - барои пойафзол, либосворӣ, нафар, кас, тан - воҳиди ҳисоб кардани миқдори одамон, то ва ё та - пасванди нумератив, ки миқдорро ифода менамоянд. «Ҳар сухан ҷоеву ҳар нукта мақоме дорад», фармудаанд гузаштагонамон ва онро бояд қатъиян риоя намуд.
Мазбут ВОҲИДОВ,
шаҳри Хуҷанд
Баёни ақида (0) Санаи нашр: 30.09.2014 №: 190 Мутолиа карданд: 1512
