маориф
РАШТ. МАКТАБИ НАВ БА ИСТИФОДА ДОДА ШУД
Бо Қарори Ҳукумати Ҷумҳурии Тоҷикистон аз 3 декабри соли 2011 Барномаи рушди иҷтимоию иқтисодии ноҳияи Рашт барои солҳои 2012-2016 қабул гардидааст.
Мутобиқи ин барнома сохтану ба истифода додани корхонаю иншооти истеҳсолӣ, муассисаҳои таълимӣ, тандурустӣ ва фарҳангӣ дар нақша мебошад. Баҳри татбиқи он аллакай чандин иншооти муҳими хоҷагии халқ сохта шудааст. Аз ҷумла дар ноҳия сохтмони таълимгоҳи нав ва синфхонаҳои иловагӣ ба нақша гирифта шуда, аксарияти онҳо мавриди истифода қарор гирифтанд ва қисме дар арафаи анҷомёбист.
Солҳои зиёде буд, ки мактаби чӯбини рақами 24-и Ҷамоати деҳоти Ҷафр дар ҳолати садамавӣ қарор дошт. Бар замми ин норасоии синфхонаҳо ба раванди таълиму тарбия таъсири манфии худро мерасонд. Вазъи баамаломада роҳбарияти ноҳияро бетараф гузошта натавонист.
Натиҷаи ин буд, ки бо ташаббуси раиси ноҳия, узви Маҷлиси миллии Маҷлиси Олии Ҷумҳурии Тоҷикистон С. Абдураҳмонов ва дастгирии молиявии мақомоти иҷроияи маҳаллии ҳокимияти давлатии ноҳия зиёда аз як миллион сомонӣ ҷудо карда шуда, мактаби замонавӣ сохта, мавриди баҳрабардорӣ қарор гирифт.
Таълимгоҳ дорои 10 синфхонаи барҳаво буда, барои 520 хонанда муқаррар гардидааст. Бинои мактабро сохтмончиёни ҶДММ «Наимӣ» (роҳбараш Маҳмаднаим Наимов) бо сифати баланд сохтанд.
Дар рафти ифтитоҳи расмии бинои мазкур раиси ноҳия С. Абдураҳмонов дар назди падару модарон, мактаббачагон ва муаллимон ва сокинони деҳа баромад карда, иброз дошт, ки бо шарофати истиқлолият ва дастгириҳои пайвастаи Ҷаноби Олӣ муҳтарам Эмомалӣ Раҳмон соҳаи маорифи ноҳия рушд ёфта, ба пешравиҳои назаррас ноил мешавад. Вазифаи ҳар як падару модар аз он иборат аст, ки ба таҳсили фарзандон таваҷҷуҳи хоса зоҳир намоянд, садди роҳи таҳсили онҳо нагарданд, зеро заминаи дониш ва омода намудани мутахассисони касбӣ маҳз аз мактаби таҳсилоти миёна ибтидо мегирад.
Мирзосафар РИЗВОНОВ, ноҳияи Рашт
Баёни ақида (0) Санаи нашр: 15.10.2014 №: 200 Мутолиа карданд: 1392
