номаҳо
АГАР НИМПАЙКАРАИ ӮРО МЕСОХТАНД
Журналисти мубориз ва ҳақталош Мусофир Набиев ба беморӣ гирифтор шуда, бистарӣ гардид. 20-уми декабри соли 1995 ситораи умраш канда шуд ва сарои сипанҷро падруд гуфт.
Маҳз хизматҳои шоёни ӯ дар ҷодаи фарҳанг буд, ки пас аз истиқрори сулҳ, дақиқтараш 17-уми сентябри соли 1998 мактаби рақами 26-и деҳаи Ғаберӯди ноҳияи Айниро ба номи ӯ гузоштанд.
Мавсуф соли 1950 шомили факултаи филологияи тоҷики Донишгоҳи миллии Тоҷикистон мегардад. Дар курси сеюм таҳсил менамуд, ки дар маҷаллаи «Шарқи Сурх» (ҳоло «Садои Шарқ») ҳикояеро таҳти унвони «Ҷӯраҳо» ба дасти чоп дод. Ҳанӯз аз даврони донишҷӯияш дар нашрияи «Тоҷикистони Советӣ» (ҳоло «Ҷумҳурият») фаъолият мекард. Пас аз хатми донишгоҳ ба сифати хабарнигор дар ҳамин нашрия то соли 1959 ифои вазифа намудааст. Аз соли 1959 Мусофир Набиев ба маҷаллаи «Занони Тоҷикистон» (ҳоло «Фирӯза») ба кор гузашта, ба ҳайси муҳаррир, мудири шуъба ва котиби масъул ифои вазифа намуда, 36 соли умри худро дар ҳамин нашрия гузаронидааст. Номбурда муаллифи китобҳои «Сапедадам», «Ҳиҷрон», «Хонаи мо» ва як қатор китобҳои дигар мебошад.
Агар аз ҷониби соҳибкоре ва ё шуъбаи фарҳангу маорифи ноҳияи Айнӣ нимпайкараи марҳумро дар назди мактаб мегузоштанд, нуран ало нур мешуд.
Азимҷон БАДАЛПУР,
ноҳияи Айнӣ
Баёни ақида (0) Санаи нашр: 13.11.2014 №: 221 Мутолиа карданд: 1443
