порлумон
ОЁ ФОИЗИ ҚАРЗҲО ПАСТ МЕШАВАД?
Ба ин суол Абдуҷаббор Ширинов, раиси Бонки миллии Тоҷикистон, зимни иштирок дар ҷаласаи Маҷлиси намояндагони Маҷлиси Олӣ посух дода, иброз дошт, ки фоизи қарзҳо асосан аз бозор, яъне аз таклифу пешниҳодҳо вобаста аст.
Имрӯз талабот ба қарз хеле зиёд аст. Соли 2013 фоизи қарзҳо 24 буд ва имсол ба 24,72 фоиз расид. Назар ба гуфтаи раиси Бонки миллӣ ин қарзҳо асосан аз ҳисоби пасандозҳо дода мешаванд. Фоизи миёнавазни пасандозҳо имсол баръакс паст шудааст. Агар соли гузашта 15,75 фоиз бошад, имсол ба 15,13 фоиз расид. Яъне 0,6 фоиз пасттар шудааст. Бо вуҷуди баланд будани фоизи қарзҳо баргардондани қарзҳои хурд ба 98 фоиз мерасад.
Шукурҷон Зуҳуров, Раиси Маҷлиси намояндагон, гуфт, ки яке аз омилҳои рушд наёфтани соҳибкории хурду миёна баланд будани фоизи қарзҳост. Бинобар ин, бояд фоизи қарзҳоро паст кард ва шароити мусоидеро барои соҳибкорон фароҳам сохт, то ки теъдоди корхонаҳои хурди истеҳсолӣ афзоянду ҷойҳои нави корӣ пайдо шаванд. Баъзе бонкҳо ва муассисаҳои қарздиҳӣ маблағҳоро аз хориҷи мамлакат бо фоизи паст, яъне аз 6 то 12 ворид карда, ба мардум бо фоизи баланд медиҳанд. Магар фоизи қарзҳоро то чор маротиба афзун кардан аз рӯи инсоф аст?!
Шояд вақти он расида бошад, ки ҳамон бонкҳо ва муассисаҳои қарздиҳии хориҷӣ вориди бозори кишвар шаванду бевосита ба мардум бо фоизи паст қарз диҳанд?
Мунаввари САФАР,
«Ҷумҳурият»
Баёни ақида (0) Санаи нашр: 26.11.2014 №: 230 Мутолиа карданд: 1634
