маориф
ТАҲСИЛ ДАР БИНОИ НАВ
Дар арафаи соли таҳсили нави хониш дар ҳаёти омӯзгорону хонандагони мактаби таҳсилоти миёнаи умумии № 24 – и ноҳияи Бобоҷон Ғафуров воқеаи фараҳбахш рух дод. Ин ҷо бо иштироки Сарвари давлат Ҷаноби Олӣ, Эмомалӣ Раҳмон бинои нави мактаб барои 360 хонанда мавриди истифода қарор гирифт.
Бинои мактаб дуошёна буда, онро аз ҳисоби буҷети вилояти Суғд ба маблағи 5 миллион сомонӣ бинокорони ҶДММ «Евростройсервис» (сардораш Маҳмуд Умаров) сохта, ба истифода доданд. Ҳамзамон бинои нави мактаб бо маблағи 321 ҳазор сомонӣ бо таҷҳизоти нави таълимӣ муҷаҳҳаз гардонида шуд. Бинои нави таълимӣ аз 14 синфхона, аз ҷумла як синфхонаи компютерӣ, ошхонаи дорои 80 ҷойи нишаст, толори варзишӣ барои 100 нафар, маҷлисгоҳ иборат аст. Феълан дар ин ҷо 430 хонанда дар ду баст таҳсил карда, ба онҳо 50 нафар, аз ин шумора 45 нафар занҳо таълиму тарбия медиҳанд, ки беш аз 90 фоизашон хатмкардагони ҳамин мактаб мебошанд.
Тавре сарвари мактаб Раъно Ҳасанова иброз намуд, солҳои пеш ҷомеаи омӯзгорону хонандагони таълимгоҳ бо душвориҳои зиёде дучор мешуданд. Зеро бинои қаблии таълимгоҳ ҳанӯз соли 1929 сохта шуда, дар ҳолати садамавӣ қарор дошт ва баҳри пешбурди муваффақонаи корҳои таълиму тарбия чандон мувофиқ набуд. Бо вуҷуди ин ҳайати омӯзгорони мактаб кӯшиш мекарданд, ки шогирдонро бо донишҳои пухта мусаллаҳ намоянд ва ба ин ҳадафи худ ноил ҳам мешуданд. Далели ин нукта ҳамин аст, ки аз 40 нафар хатмкарда дар соли таҳсили гузашта 18 нафар ба таълимгоҳҳои олии касбӣ ва 15 нафар ба мактабҳои таҳсилоти миёнаи касбӣ дохил шуданд.
Муаллимони мактаб азми қавӣ доранд, ки бо мавриди истифода гирифтани бинои мактаб ва беҳ гардидани шароити таълиму тарбия дастовардҳои худро минбаъд боз ҳам афзунтар созанд. Зеро акнун баробари мавҷудияти синфхонаҳои васею барҳаво ва бо таҷҳизоти нави таълимӣ муҷаҳҳаз, омӯзгорони донишманд баҳри ташкили хуби машғулиятҳо маҳфилҳои «Физикҳои ҷавон», «Химикҳои ҷавон», «Математикҳои ҷавон», «Ганҷи сухан», инчунин маҳфилҳои дӯзандагӣ, бофандагӣ, аз ҷумла қолинбофӣ, рӯзгордорӣ ва ғайра шароитҳои мусоид фароҳам гардиданд.
Матн ва суратҳои
Мирзосафар РИЗВОНОВ
Баёни ақида (0) Санаи нашр: 24.12.2014 №: 252 Мутолиа карданд: 1444
