маориф
ДОНИШКАДА ТАҒЙИРИ НОМ МЕКУНАД
Ректори Донишкадаи давлатии забонҳои Тоҷикистон ба номи Сотим Улуғзода Хуршед Зиёев зимни нишасти матбуотӣ аз фаъолияти донишкадаи мазкур дар соли ҳисоботии 2014 гузориши мухтасар дод. Ӯ аз ҷумла иттилоъ дод, ки дар донишкада чор факултет ва 11 кафедра фаъолият намуда, донишҷӯён ба омӯзиши 10 забони хориҷӣ аз рӯйи ихтисос фаро гирифта шуданд.
Донишкада соли гузашта бори нахуст натиҷаҳои қабулро тибқи имтиҳоноти мутамарказ дар Маркази миллии тестӣ баррасӣ кард. Ба муассиса аз 749 ҷойи мувофиқи нақша муайянгардида 551 нафар дохил гардид, ки ин ба 74 фоиз баробар аст. Аз ин шумора 226 нафар ба тариқи буҷавӣ ва 325 нафар шартномавӣ донишҷӯ шуданд. Ба 58 нафари дигар донишҷӯ шудан аз тариқи квотаи президентӣ насиб гардид. Муассисаро 540 нафар хатм намуданд. Маълумоти расида гувоҳӣ медиҳад, ки 8 хатмкардаи мо то ҳол ба муассисаҳои таълимии роҳхатгирифтаашон ҳозир нашуданд. Нисбат ба онҳо тибқи қонунгузории ҷорӣ тадбир андешида хоҳад шуд.
Ба пурсиши рӯзноманигорон дар бораи фаъолияти минбаъдаи донишкада ректор чунин посух гуфт:
- Зимни баррасии лоиҳаи Барномаи давлатии такмили омӯзиши забонҳои русӣ ва англисӣ барои солҳои 2015 - 2020, ки моҳи июни соли 2014 дар маҷлиси Ҳукумати ҷумҳурӣ сурат гирифт, бо супориши Президенти кишвар муҳтарам Эмомалӣ Раҳмон лоиҳаи як бинои иловагии таълимӣ дар донишкада таҳия ва пешниҳод гардид. Дар назар аст, ки сохтмони он аз ибтидои соли равон шурӯъ мешавад. Ҳамчунин дар барномаи зикршуда тағйири номи донишкада ва ба «Донишкадаи забон ва робитаҳои байналмилалӣ» табдил додани он пешбинӣ шудааст.
Э. НАЗАРИЁН
Баёни ақида (0) Санаи нашр: 23.01.15 №: 16 Мутолиа карданд: 5630
