маориф
БАЛЕ, МАОРИФРО БА БОЗОР ТАБДИЛ НАДИҲЕМ
Шуъбаи маорифи мақомоти иҷроияи маҳаллии ҳокимияти давлатии ноҳияи Абдураҳмони Ҷомӣ мақолаи «Маорифро ба бозор табдил надиҳем»-ро, ки дар рӯзномаи «Ҷумҳурият» (6.01.2015, №3) нашр шудааст, мавриди баррасӣ қарор дод.
Гуфтан лозим аст, ки на ҳамаи факту рақамҳои мақолаи мазкур ҳақиқат доранд. Барои мисол, дар мақола омадааст, ки: «Мо, як гурӯҳ волидайн, ба назди директори мактаб рафта, сабаби китобҳои муҳлати иҷораашон ба охир расидаву бо нархи гарон фурӯхтаи онҳоро пурсидем. Раҳмон Усмонов, директори мактаб, посух дод, ки дар ин бора ягон маълумот надорад ва ин нархро шуъбаи маориф гузоштааст».
Шуъбаи маориф иттилоъ медиҳад, ки пас аз ворид шудани китобҳои нав танҳо нархномаи 3 соли минбаъдаро аз рӯи нархномаи аслии китоб муайян карда, ба мактабҳо дастрас менамояд. Яъне, агар 1 китоб 15 сомонӣ арзиш дошта бошад, ҳамин маблағ дар тӯли 3 сол пардохт мешавад ва ҳаққи иҷораи яксолаи он 5,10 дирамро ташкил медиҳад. Китобҳое, ки муҳлати иҷораашон аз 3 сол зиёдтар гузаштааст, дар сурати норасоии китоби дарсӣ дар дилхоҳ мактаб бо қарори шӯрои педагогӣ бо арзиши 50% арзон аз нархи иҷораи яксолаи он ба хонанда пешниҳод мешавад.
Дар мавриди норасоии китобҳои дарсӣ бояд гуфт, ки воқеан китобҳои иҷораи хонандагон барои синфи 11 дар солҳои охир дар ҳаҷми 20% ба муассисаҳои таълимии ноҳия дастрас гардидаанд.
Норасоии китобҳои дарсӣ барои синфҳои ибтидоӣ қариб бартараф гашт. Ягона камбудие, ки дар ин самт дида мешавад, ин аз беназоратии маъмурияти мактабҳо ва волидайн зуд фарсудаю корношоям гардидани китобҳо мебошанд.
Китобҳои дарсие, ки муҳлати иҷораашон ба охир расида, ба бемасъулиятии баъзе роҳбарони синфҳо бо нархи гаронтар ба хонандаҳо тақсим шудаанд. Нисбат ба роҳбарият ва омӯзгорони ин муассисаҳои таълимӣ чораҳои зарурӣ андешида шуданд.
Дар хусуси дафтари махсусе, ки аз ҷониби Вазорати маориф ва илм барои тақсимоти китобҳои дарсӣ ба муассисаҳои таълимии ноҳия дастрас гардидаанд, бояд гуфт, ки воқеан ин ҳолат вуҷуд дорад. Яъне, дафтарҳо сари вақт дастрас гардидаанд, аммо аз бемасъулиятӣ ва хунукназарии баъзе роҳбарон ва китобдорони мактабҳо ин дафтар, ки бояд ҳатман тақсимоти китобҳо дар он қайд гардад, мавриди истифода қарор дода шуда бошад ҳам, вале пурра нест ва хато қайд шудааст.
Шуъбаи маориф эродҳои мақолаи мавриди назарро қисман қобили қабул дониста, барои сари вақт бартараф намудани камбудиҳо чораҳои зарурӣ андешида, барои минбаъд рух надодани ин ҳолатҳо аз тамоми имкониятҳо истифода хоҳад бурд.
Т. МАҲМАДЁРОВ,
мудири шуъбаи маорифи
ноҳияи Абдураҳмони Ҷомӣ
P.S. Дар мақолае, ки ин муаллифон посух навиштаанд, акси рӯйхати китобҳои фурӯхташудаи муҳлати иҷораашон ба охир расида бо нархашон пешкаши хонандагон гардида буд, ҳамон далелеро, ки ҳоло мудири шуъбаи маориф инкор мекунад. Камбудиро ба дӯши мудири маориф ё директори мактаб ҳавола кардан роҳи ҳал нест. Муҳим ин аст, ки волидайн нархи китобҳои дарсии харидаашонро аз нархи дар рӯйхати мактаб зикршуда зиёдтар мегӯянд.
Баёни ақида (0) Санаи нашр: 3.03.2015 №: 44 Мутолиа карданд: 1448
