маориф
ИҚДОМИ НАВИ АКАДЕМИЯИ ИЛМҲОИ КИШВАР
Барои Ҷоми Президенти Академияи илмҳои Тоҷикистон 300 донишҷӯ дар олимпиада ширкат варзиданд. Онҳо дар равияҳои илмҳои дақиқу табиатшиносӣ - биология, иқтисод, кимиё, технология ва инновтасия сатҳи дониши худро санҷиданд. Беҳтаринҳо роҳхати таҳсили ройгон дар бахшҳои магистратура ва аспирантура дар Академияи илмҳои кишварро ноил гаштанд.
Дар ин озмун донишҷӯёни Донишгоҳи миллии Тоҷикистон ҷойи аввал ва филиали тоҷикистонии Донишгоҳи давлатии Маскав ба номи Ломоносов дар шаҳри Душанбе ҷойи дуюмро ишғол карданд.
Фарҳод Раҳимӣ, Президенти Академияи илмҳои ҷумҳурӣ, зимни муаррифии ғолибон ҳадаф аз баргузории ин иқдомро дастгирии ҷавонони соҳибмаърифат ва фароҳам овардани шароит барои рушди илм дар оянда арзёбӣ кард:
- Ҷавононе, ки роҳи илмро интихоб кардаанд, ҳамеша мавриди таваҷҷуҳ ва дастгирӣ қарор мегиранд. Ҳадафи озмун ҳам ҷалби ҷавонон аз замони донишҷӯйӣ ба илму пажӯҳиш аст. Ҳамаи пажӯҳишгоҳҳои Академияи илмҳои кишвар вазифадор мешаванд, ки бо ғолибони даври ниҳоии олимпиада дар тамос бошанд. Донишҷӯён барои худ роҳбар, мавзӯъ ва самти илмиашонро интихоб намоянд. Аз ҷамъбасти озмун ба хулоса омадем, ки шеваи баргузории олимпиадаҳои байнидонишгоҳӣ, ки ҳама-сола ба эҳтимоми Вазорати маориф ва илм баргузор мегардад, чандон мувофиқ ба талабот нест. Бархе аз донишҷӯёне, ки ба ин олимпиадаҳо дастрасӣ надоштанд, дар олимпиадаи Академияи илмҳо натиҷаҳои хуб ба даст овардаанд.
Донишҷӯён аз баргузории озмун ва зоеъ нашудани талошҳои худ дар роҳи илм қаноатманд гардиданд. Олимҷони Пираҳмад, донишҷӯйи Донишгоҳи миллии Тоҷикистон, яке аз ғолибони озмун аст. Ӯ мегӯяд, дар чандин озмунҳои дохилӣ ғолиб омадаст, вале ҳоло камбудиҳои озмунҳои дигарро дарк кардааст.
Ғолибони озмун мегӯянд, ки баргузории озмунҳо дар кишвар дар сатҳҳои мухталиф чашми донишҷӯёнро барои ширкат дар олимпиадаҳои байналмилалӣ мекушояд ва таваҷҷуҳи онҳоро ба илм бедор месозад.
Гулхумор САНГОВА,
омӯзгор
Баёни ақида (0) Санаи нашр: 31.03.2015 №: 66 Мутолиа карданд: 1337
