порлумон
НАТИҶАҲОИ ИНТИХОБОТИ АЪЗОИ МАҶЛИСИ МИЛЛӢ ЭЪЛОН ШУД
Комиссияи марказии интихобот ва раъйпурсии Ҷумҳурии Тоҷикистон рӯзи 28 март зимни баргузории як ҷаласа натиҷаҳои интихоботи аъзои Маҷлиси миллии Маҷлиси Олиро эълон кард.
Шермуҳаммади Шоҳиён, раиси Комиссияи марказии интихобот ва раъйпурсӣ дар ҷамъи хабарнигорон изҳор дошт, ки рӯзи 27 марти соли равон раъйдиҳӣ оид ба интихоботи аъзои Маҷлиси миллӣ дар тамоми ҳавзаҳои интихоботӣ муташаккилона баргузор гардид.
Зикр шуд, ки аз ҳар ҳавзаи бисёрмандатии интихоботӣ, аз ҷумла ҳавзаи интихоботии Вилояти Мухтори Кӯҳистони Бадахшон №1, Суғд №2, Хатлон №3, шаҳри Душанбе №4 ва ҳавзаи интихоботии шаҳру ноҳияҳои тобеи ҷумҳурӣ №5 номзадии 5 нафарӣ, дар маҷмӯъ 25 нафар пешбарӣ шуда буд. Вакилони интихобкунанда аз вилоятҳо ва шаҳру ноҳияҳои ҷумҳурӣ дар интихоботи аъзои Маҷлиси миллии Маҷлиси Олӣ дар ҷаласаҳои якҷояи худ ба тарафдории номзадҳои арзандаашон раъй доданд. Иттилоъ дода шуд, ки ҳамаи номзадҳои пешниҳодшуда бо гирифтани аксари орои интихобкунандагон узви Маҷлиси миллии Маҷлиси Олии Ҷумҳурии Тоҷикистон интихоб шуданд.
Зимнан, дар комиссияҳои ҳавзавии интихобот оид ба интихоботи аъзои Маҷлиси миллии Маҷлиси Олӣ аз 13 марти соли 2015 сабти номзадҳо ба аъзогии Маҷлиси миллӣ оғоз гардида, 22 марти соли 2015 ба анҷом расид. Пас аз он Комиссияи марказии интихобот ва раъйпурсӣ тибқи талаботи моддаи 41 Қонуни конститутсионии Ҷумҳурии Тоҷикистон «Дар бораи интихоботи Маҷлиси Олии Ҷумҳурии Тоҷикистон» дар муҳлати муқарраргардида, яъне на дертар аз 7 рӯз то интихобот, ба комиссияҳои ҳавзавии интихобот оид ба интихоботи аъзои Маҷлиси миллии Маҷлиси Олӣ бюллетенҳои интихоботиро дастрас намуд.
Ёдовар мешавем, ки бо Фармони Президенти Ҷумҳурии Тоҷикистон аз 5 декабри соли 2014 интихоботи даъвати нави аъзои Маҷлиси миллии Маҷлиси Олии Ҷумҳурии Тоҷикистон рӯзи 27 марти соли 2015 таъйин гардида буд.
Шермуҳаммади Шоҳиён зимни ҷаласа изҳор дошт, ки дар робита ба интихоби аъзои Маҷлиси миллӣ ба унвони Комиссияи марказии интихобот ва раъйпурсӣ арзу шикоят ворид нашудааст.
Фирӯзи РАҲМОНИЁН, «Ҷумҳурият»
Баёни ақида (0) Санаи нашр: 31.03.2015 №: 66 Мутолиа карданд: 1393
