мулоқотҳо
МУЛОҚОТИ ЭМОМАЛӢ РАҲМОН БО СЕРГЕЙ ЛАВРОВ
Эмомалӣ Раҳмон, Президенти Ҷумҳурии Тоҷикистон, 2 апрел вазири корҳои хориҷии Федератсияи Русия Сергей Лавровро ба ҳузур пазируфт.
Дар ин бора Хадамоти Президенти Ҷумҳурии Тоҷикистон иттилоъ дода, менависад, ки дар мулоқот масоили вобаста ба ҳамкории дуҷониба ва бисёрҷонибаи Тоҷикистону Русия баррасӣ шуд. «Мавзӯъҳои ҳамгироӣ дар соҳаи амнияти минтақавӣ, вазъи ҳуқуқии муҳоҷирони кории тоҷик дар Русия ва ҷалби сармоя ба иқтисоди Тоҷикистон дар маркази таваҷҷуҳ қарор дошт. Ҷониби Тоҷикистон аз вазъи ҳуқуқии натанҳо муҳоҷирони корӣ, балки донишҷӯёни тоҷик, ки дар Русия таҳсил мекунанд ва ё аз тариқи он ба кишварҳои дигар мераванд, изҳори нигаронӣ намуд».
Сергей Лавров, вазири корҳои хориҷии Федератсияи Русия, пас аз дидор бо Эмомалӣ Раҳмон дар суҳбат бо хабарнигорон натиҷаҳои мулоқоташ бо Сарвари давлатро созанда унвон кард. Аз ҷумла изҳор дошт, ки мо дар ҷараёни мулоқот раванди ҳамкориҳои иқтисодиву тиҷоратии ду кишварро мавриди баррасӣ қарор дода, роҳҳои рушди минбаъдаро матраҳ намудем. Ба гуфтаи Сергей Лавров, феълан 4 санади нав миёни ду давлат омода шудааст, ки тасвиби он мушкилоти вобаста ба ҳифзи ҳуқуқи муҳоҷирони кории Тоҷикистон дар Русияро бартараф хоҳад кард. Дар ин самт пешравӣ ба назар мерасад. Талош мешавад, ки дар доираи ин санадҳо мушкилоти мавҷудаи муҳоҷирон рафъ гардида, ҳуқуқу манфиатҳояшон ҳифзу мавриди истисмор қарор нагиранд, - гуфт вазири корҳои хориҷии Федератсияи Русия.
Бино ба гуфтаи Сергей Лавров, тавсеаи ҳамкориҳои ҳарбию техникӣ байни ду кишвар ва расондани ёрии низомии техникӣ ба неруҳои марзбонии Тоҷикистон дар доираи ҳамкориҳои Созмони Аҳдномаи амнияти дастаҷамъӣ низ дар меҳвари гуфтугӯ қарор гирифтааст.
Мунаввари САФАР,
«Ҷумҳурият»
Баёни ақида (0) Санаи нашр: 4.04.2015 №: 70 Мутолиа карданд: 1277
