маориф
Барномаи рушди илмҳои дақиқ ва табиатшиносӣ амалӣ мешавад
Ҳамасола Паёми Президенти кишвар Эмомалӣ Раҳмон ба Маҷлиси Олии ҷумҳурӣ барои беҳтар намудани фаъолияти мо дастурҳои муфид медиҳад.
Сардори давлат дар баробари дарку пешниҳоду таҳлили масъалаҳои мубрами соҳа роҳҳои ҳалли онҳоро низ муайян мекунанд. Инчунин барои рафъи норасоиҳои мавҷуда ва болоравии сифати таълим бештар аз пештар ғамхорӣ ва дастгирӣ менамоянд. Аз ҷумла, дар соли равон ба ин соҳа 1 миллиарду 140 миллион сомонӣ ҷудо гардид, ки нисбат ба панҷ соли охир 4 баробар зиёд аст.
Аз масъалаҳои нигаронкунандае, ки дар ҳалли он мо оҷиз меомадем, ин ба таҳсил фаро гирифтани духтарон баъд аз хатми синфи 9 буд. Чаро? Чунки вобаста ба қонунгузориҳои кишвар таҳсили пас аз он ҳатмӣ набуд. Бархе аз волидон ба ин асос монеи идомаи таҳсили духтарон мегардиданд. Дар натиҷа бисёре аз духтарони соҳибистеъдоди миллат имкони гирифтани маълумоти олии касбиро аз даст медоданд. Аз ҷумла соли гузашта 24 ҳазор нафар аз таълим дар канор монд. Аз чунин ҳолат гурӯҳе аз волидон суиистифода намуда, духтаронашонро барвақт аз синни муқарраршуда ба шавҳар медоданд. Дар ин ҳол магар тарбияи дурусту солими фарзандони миллатро интизор шудан мумкин аст? Албатта, рафъи андак зарари дур аз маърифат мондан басо мушкилу вақти зиёдро хостор мебошад.
Вобаста ба ин мушкилоти мавҷуда Президенти мамлакат дар Паёми навбатӣ пешниҳод намуданд, ки аз моҳи сентябри соли 2010 ба таҳсилоти ҳатмии 10-сола замина фароҳам оварда шавад.
Маълум аст, ки дар муассисаҳои таълимӣ мушкилоти нарасидани ҷойи нишаст мавҷуд аст. Аммо бояд ёдовар шуд, ки соли гузашта Барномаи давлатии сохтмон ва таъмиру азнавсозии мактабҳо барои солҳои 2008-2015 қабул гардидааст. Дар доираи он беш аз 800 мактаб бунёду таъмир ва азнавсозӣ мешавад. Дар баробари ин Сардори давлат раисони вилояту шаҳру ноҳияҳои кишварро вазифадор карданд, ки дар бунёду таъмиру азнавсозии мактабҳо бо истифода аз имкониятҳои мавҷуда саҳми муносиб бигиранд. Яъне мушкилот дар солҳои наздик рафъ мегардад.
Президенти мамлакат инчунин моро вазифадор намуданд, ки нерӯву имконоти худро ба тавсеа ва инкишофи илмҳои техникӣ ва риёзӣ равона намоем, то заминаи такомули шуури техникӣ ва иқтисодии ҷомеа фароҳам оварда шавад. Ба ин мақсад Барномаи рушди илмҳои дақиқ ва табиатшиносӣ барои солҳои 2010-2020 омода ва мавриди амал қарор мегирад.
Ба ҷуз ин аз он изҳори нигаронӣ карданд, ки хонандагону толибилмонро ба корҳои мавсимӣ сафарбар менамоянд ва ин ба болоравии сифати таълим монеа эҷод мекунад.
Дуруст аст, ки бо вуҷуди ғамхориҳои зиёд, фароҳам овардани имконот ҳанӯз ҳам сатҳу сифати таълим, донишандӯзӣ ва тайёр кардани кадрҳои баландихтисос ҷавобгӯи талаботи давр нест.
Паёми Президенти мамлакат ба Маҷлиси Олии ҷумҳурӣ дар ҳама муассисаҳои таълимӣ мавриди омӯзиши ҷиддӣ қарор мегирад. Кӯшиш ба харҷ дода мешавад, ки дастуру супоришҳои Сардори давлат сари вақт ва бо сифати баланд иҷро гарданд.
Абдуҷаббор РАҲМОНОВ,
вазири маорифи ҷумҳурӣ
Баёни ақида (0) Санаи нашр: №: Мутолиа карданд: 6233
