мулоқотҳо
Президент сафири нави
Малайзияро ба ҳузур пазируфт
20 апрел Президенти Ҷумҳурии Тоҷикистон Эмомалӣ Раҳмон аз Сафири фавқулодда ва мухтори Малайзия дар Тоҷикистон Абдулазиз ибни Ҳарун эътимоднома қабул намуд.
Дар мулоқоти Сардори давлат Эмомалӣ Раҳмон бо ӯ масъалаи ҳамкории Тоҷикистону Малайзия баррасӣ шуд.
Президенти мамлакат Эмомалӣ Раҳмон аз «сатҳи баланди эътимод, ҳусни ният ва созандагӣ», ки миёни роҳбарияти олии Тоҷикистону Малайзия ба назар мерасад, изҳори қаноатмандӣ карда, омодагии худро баҳри густариши ҳамкории гуногунҷанба бо ин кишвар таъкид намуд.
Таҳкиму тавсеаи ҳамкории иқтисодӣ, техникӣ, технологӣ, илмию фарҳангӣ ва иттилоотӣ зарур шумурда шуд.
Ҳамкорӣ дар соҳаҳои кишоварзию туризм, дар самти сохтмони нерӯгоҳҳои барқи обӣ, корхонаҳои муштараки саноатӣ, истеҳсоли таҷҳизот ва василаҳои барқӣ, ҳамчунин матоъҳои пахтагӣ ва абрешимӣ аз роҳҳои густариши робитаҳои барои ҳар ду ҷониб судовар маънидод гардид.
Дар мулоқот ҳамчунин оид ба ҳамкорӣ дар чаҳорчӯби Созмони конфронси исломӣ ва дигар созмонҳои байналмилалӣ гуфтугӯи судманд сурат гирифт.
Абдулазиз ибни Ҳарун дуруду паёми Шоҳ ва Сарвазири Малайзияро ба Президенти Тоҷикистон Эмомалӣ Раҳмон расонда, ӯро аз номи онҳо даъват намуд, ки ба Малайзия сафари давлатӣ анҷом диҳад.
Баёни ақида (0) Санаи нашр: №: Мутолиа карданд: 1901
