маориф
ТАРБИЯ – ҶАВҲАРИ РУШДИ ИНСОН
Таърих собит месозад, ки маънавиёт сифатҳои фитрии инсон буда, густариш ва таҳкими пайвастаи арзишҳои милливу умумибашарӣ, рушди ҳамвораи илму маориф, технология ва татбиқи бозёфтҳои навтарин дар фаъолияти созандаи инсоният ҷавҳари аслии рушду тараққии ҷомеаи ҷаҳонӣ ба ҳисоб меравад.
Президенти кишвар, муҳтарам Ҷаноби Олӣ, Эмомалӣ Раҳмон аз нахустин Паёми хеш ба Маҷлиси Олӣ ба пешрафти соҳаи маориф ҳамчун пойдевори рушду тараққиёти тамоми соҳаҳои ҳаёти ҷомеа таваҷҷуҳи махсус зоҳир намуда, ин равандро дар Паёмҳои минбаъдаи хеш муттасил идома дода истодаанд. Маҳз, дар асоси нуктаҳои Паём барнома ва консепсияҳои муҳими давлатӣ қабул гардиданд, ки барои амалӣ намудани ислоҳоти соҳаи маориф ва дар ин замина беҳтар кардани шароити кории олимону омӯзгорон ва сатҳи таълиму тарбия дар ҳамаи зинаҳои таҳсилот такони ҷиддӣ бахшиданд.
Ҳамчунин бо бунёду таҷдиди муассисаҳои таълимӣ, таъмини техникаи компютерӣ, баланд бардоштани сатҳу сифати таълим, тайёр намудани кадрҳои баландихтисос, дигаргуниҳои зиёде ба амал омад.
Президенти кишвар дар Паёми имсолаи хеш ба Маҷлиси Олӣ таъкид намуданд, ки: “Омӯзгор дар раванди таълиму тарбия ҳуқуқи хато кардан надорад, зеро тақдири насли ояндасоз ва пешбарандаи давлату ҷомеа дар дасти ӯст. Яъне омӯзгор дар раванди таълиму тарбия баробари падару модар ва шахсоне, ки онҳоро иваз мекунанд, нақши асосӣ дорад ва ҳамчун роҳнамои маънавӣ барои ба камол расонидани насли шоистаи даврон масъул аст”.
Аз ин рӯ, бо таъкиди Президенти кишвар, дастгирии соҳаи маориф ва баланд бардоштани мақоми омӯзгор, дар навбати аввал, аз он ҷиҳат муҳим мебошад, ки аҳли маориф дар рушди неруи инсонӣ саҳми бевосита дошта, яке аз қувваҳои пешбаранда ва фаъоли ҷомеаи имрӯза ба шумор меравад ва гузашта аз ин, пешрафти тамоми соҳаҳои ҳаёти ҷомеа ва давлат ба сатҳи рушди маориф вобастагии мустақим дорад.
Имрӯз, мо - омӯзгоронро зарур аст, ки дар ҷараёни таълим кӯшиш намоем, танҳо бо гузаронидани машғулиятҳои фаннӣ маҳдуд нашуда, дар баробари таълим ба масъалаи тарбияи ҳамаҷонибаи ҷавонону наврасон, бахусус ба тарбияи ватандӯстӣ ва баланд бардоштани ҳисси миллии онҳо эътибори аввалиндараҷа диҳем.
Бо кору пайкори худ истиқлоли миллиро ҳамчун муқаддастарин дастоварди миллат ва неъмати гаронбаҳо ҳифз намоем, онро ҳамвора таҳким бахшем, ҷаҳони маънавии насли ҷавонро ғанитар гардонем. Зеро, дар ҷомеаи имрӯзаи Тоҷикистон ташаккул ва вусъат бахшидани тафаккури нави сиёсиву маънавии насли ҷавон мавзӯи муҳимтарин шуморида шудааст, ки маҳаки он ҳифзи дастовардҳои истиқлолият, ваҳдату худшиносии миллӣ, эҳсоси ватанпарастӣ ва ҳимояи манфиатҳои давлату миллат мебошад.
Амирулло САТТОРОВ,
омӯзгори мактаби таҳсилоти
миёнаи умумии № 16 ба номи А.Шукурови ноҳияи Восеъ
Баёни ақида (0) Санаи нашр: 3.07.2015 №: 135 Мутолиа карданд: 1586
