маориф
21 ДОНИШҶӮ ДИПЛОМИ АЪЛО ГИРИФТ
Ректори Донишкадаи соҳибкорӣ ва хизмати Тоҷикистон Диловар Қодиров зимни нишасти матбуотӣ гуфт, ки ҷиҳати беҳтар ба роҳ мондани раванди таълим ва таъмини сифати таҳсилот дар ин давраи ҳисоботӣ китобҳои дарсии «Макроиқтисод», «Менеҷменти туризм», «Назарияи иқтисод», «Иқтисодиёти институтсионалӣ» ва дигар фанҳои таълимӣ ба забони тоҷикӣ таҳия ва нашр гардиданд. 6 нафар устодони донишкада рисолаҳои номзадӣ дифоъ намуданд.
Дар самти фаъолияти илмӣ-таҳқиқотӣ 5 монографияи илмӣ, 2 китоби дарсӣ, даҳҳо дастурҳои методӣ ва воситаҳои таълимӣ, 167 мақолаи илмӣ ва дигар мақолаҳои илмӣ-оммавӣ ба табъ расида, 13 конфронси байналмилалию ҷумҳуриявӣ, машварату семинарҳо ва симпозиуму анҷуманҳо баргузор шуданд. Устодони ҷавон ва донишҷӯён дар озмунҳои ҷумҳуриявии Академияи илмҳои Ҷумҳурии Тоҷикистон ва «Навовари беҳтарин» фаъолона ширкат варзида, бо ифтихорномаҳо сарфароз гардиданд.
Санҷишу имтиҳонот пурра аз тариқи системаи электронӣ ба роҳ монда шуд. Аз 602 хатмкунанда 110 нафар имтиҳоноти давлатиро бо баҳои аъло, 154 нафар бо баҳои хуб, 75 нафар бо баҳои хубу аъло супорида, 21 нафар хатмкунанда сазовори дипломи аъло гардиданд.
Э. НАЗАРОВ, «Ҷумҳурият»
Баёни ақида (0) Санаи нашр: 8.07.2015 №: 138 Мутолиа карданд: 1417
