мулоқотҳо
Мулоқоти Эмомалӣ Раҳмон бо Мигел Маури Буендиа
22 апрел Президенти Ҷумҳурии Тоҷикистон Эмомалӣ Раҳмон аз Сафири нави Ватикан дар Тоҷикистон Мигел Маури Буендиа эътимоднома қабул намуд.
Сардори давлат Эмомалӣ Раҳмон ва Мигел Маури Буендиа оид ба ҳамкории Тоҷикистону Ватикан гуфтугӯи судманд анҷом доданд.
Сӯҳбат асосан атрофи мавзӯи гуфтугӯи миёни дину тамаддунҳои гуногуни ҷаҳон ва ҳуқуқу озодиҳои инсон сурат гирифт. Ғояҳои сулҳ, накӯкорӣ ва адолат, ки аз ҷониби намояндагони тамоми дину фарҳангҳо мавриди арҷгузорӣ қарор мегиранд, аз омилҳои асосии дӯстию ҳамкории миёни халқҳои гуногун ва эҳтирому таҳаммулпазирӣ маънидод гардид.
Таъкид шуд, ки эътиқоди динӣ ва ҳамкории намояндагони дину мазҳабҳои ҷаҳон, пеш аз ҳама бояд ба мубориза бо чунин хатару мушкилоти аҳли башар чун терроризм, экстремизм, гардиши ғайриқонунии маводи мухаддир ва ҳамчунин ба дастгирии бенавоёну мӯҳтоҷон равона гардад.
Бо қаноатмандӣ зикр гардид, ки дар Тоҷикистон намояндагони тамоми динҳои ҷаҳонӣ озодона кору зиндагӣ карда, маросимҳои динию эътиқодии худро бемонеа анҷом медиҳанд, аз ҷумла ибодаткунандагони се муассисаи мавҷудаи Калисои римӣ-католикӣ.
х х х
Мигел Маури Буендиа, Сафири фавқулодда ва мухтори Ватикан дар Тоҷикистон, баъди анҷоми мулоқоташ бо Эмомалӣ Раҳмон, Президенти Ҷумҳурии Тоҷикистон, ба намояндагони воситаҳои ахбори омма иброз дошт, ки бо Сардори давлат дар атрофи он масъалаҳое табодули назар намудааст, ки ба рушди муносибатҳои дуҷониба мусоидат карда метавонанд.
- Дар мулоқот асосан ба масъалаи гуфтугӯи миёни адён ва тамаддунҳо, ба шумули динҳои насронӣ ва ислом таваҷҷӯҳи махсус зоҳир гардид, - гуфт сафири Ватикан. ӯ изҳор намуд, ки Тоҷикистон дорои фарҳанги пурғановат ва таърихи бою рангини исломӣ аст ва метавонад онҳоро дастраси дигар мамлакатҳои ҷаҳон гардонад.
Зикр гардид, ки Ватикан беш аз 30 сол боз бо Донишгоҳи исломии Алаҳзар воқеъ дар Ҷумҳурии Мисри Араб ва дигар мактабҳои олии исломии кишварҳои мусулмонӣ робитаи мустаҳкам дорад. Тоҷикистон низ дар гуфтугӯи адён ва тамаддунҳо фаъолона ширкат варзида, бо ҳамин васила мавқею нуфузи худро дар арсаи байналмилалӣ таҳким бахшида метавонад.
Додоҷон РӮЗИЕВ, «Ҷумҳурият»
Баёни ақида (0) Санаи нашр: №: Мутолиа карданд: 2094
