барқияҳо
БАРҚИЯИ ШОДБОШ БА САРВАЗИРИ ҶУМҲУРИИ ҲИНДУСТОН
15 август Президенти Ҷумҳурии Тоҷикистон Эмомалӣ Раҳмон ба Сарвазири Ҷумҳурии Ҳиндустон Нарендра Моди барқияи шодбош ирсол намуд, ки дар он омадааст:
“Ҷаноби Олӣ,
Хушҳолам табрику таҳнияти самимии хеш ва мардуми Тоҷикистонро ба муносибати ҷашни миллӣ – солгарди Рӯзи истиқлолият ба Ҷаноби Олӣ ва мардуми дӯсти Ҷумҳурии Ҳиндустон тақдим намоям.
Мо аз дастовардҳои назарраси кишвари Шумо дар тамоми арсаҳои муҳими зиндагӣ шодем. Оғоз гаштани раванди узвияти комил пайдо намудани Ҳиндустон дар Созмони ҳамкориҳои Шанхай як намунаи ҷадиди он аст.
Тақвияту густариши ҳамкориҳои гуногунҷабҳа бо Ҷумҳурии Ҳиндустон дар сархати фаъолиятҳои ҳадафмандонаи сиёсати хориҷии Ҷумҳурии Тоҷикистон қарор дорад.
Боиси хурсандист, ки ҳамкориҳои созанда ва шарикии Тоҷикистону Ҳиндустон дар бахшҳои мухталифи иқтисоду тиҷорат, маорифу фарҳанг ва соҳаҳои амниятиву низомӣ сол аз сол рушду тавсеаи беш аз пеш меёбанд.
Умедворам, ки иҷрои аҳду паймонҳои дар рафти сафари нахустини давлатии Шумо ба Тоҷикистон ҳосилшуда, бешубҳа, ба тавсеаю густариши ҳамкориҳои мо боис гашта, ҷавобгӯи манфиатҳои ҷонибайн ва тақвияти суботи минтақа хоҳад шуд. Мо аз ҷониби худ аз тамоми имкониятҳои мавҷуда дар ин самт истифодаи муассир ба амал хоҳем овард.
Бо ибрози орзуҳои беҳтарин, сиҳатии комил ва комёбиҳои рӯзафзун ба ҷаноби Сарвазир ва ба мардуми дӯсти Ҳиндустон хушрӯзӣ, пешрафт ва саодат таманно дорам”.
Баёни ақида (0) Санаи нашр: 18.08.2015 №: 167 Мутолиа карданд: 5154
