маориф
БЕ МЕНЕҶЕР КОР ПЕШ НАМЕРАВАД
Чанде пеш бо ташаббуси роҳбарияти Донишкадаи молия ва иқтисоди Тоҷикистон ва Ассотсиатсияи миллии менеҷерону маркетингшиносон конфронси илмӣ – амалии ҷумҳуриявӣ дар мавзӯи «Муаммоҳои менеҷменти муосири Тоҷикистон» доир гардид, ки роҳҳои ҳалли як қатор масъалаҳои соҳаро рӯшан сохт. Олимони иқтисодшинос, аз ҷумла Лутфулло Саидмуродов, директори Институти иқтисод ва демографияи Академияи илмҳо, Рустам Қудратов, вакили Маҷлиси намояндагони Маҷлиси Олии кишвар, доктори илмҳои иқтисодӣ, Сайфулло Сафаров, муовини директори Маркази тадқиқоти стратегии назди Президенти ҷумҳурӣ ва дигар ихтисосмандон перомуни мавзӯъ назари худро баён намуданд.
Ашӯрбой Солеҳзода, ректори донишкада, баррасии мавзӯъро дар даврони иқтисоди бозорӣ хеле муҳим дониста, омода кардани менеҷерони ватаниро барои истифодаи самараноки захираҳои иқтисодӣ зарур шумурд. Зикр шуд, ки яке аз масъалаҳои муҳим омода кардани кадрҳои баландихтисос дар ин ҷода таъмини омӯзгорон бо китобҳои дарсӣ аст. Ҳоло ҳайати омӯзгорони кафедраи менеҷменти донишкада ду китоби дарсӣ «Менеҷмент» ва «Менеҷменти стратегӣ» - ро бо забони давлатӣ таҳия ва нашр намудаанд, ки бешак ба беҳтар гардидани сифати таълим мусоидат менамоянд.
Ҳарчанд дар макотиби олии мамлакат омодасозии кадрҳои соҳаи менеҷмент тайи солҳои охир ба таври васеъ ба роҳ монда шудааст, менеҷерони ватанӣ дар бахшҳои иқтисодиву соҳибкорӣ ҷойгоҳи хоси худро пайдо накарданд.
Ба андешаи Шавкат Бозоров, мудири шуъбаи менеҷменти донишкада, дар шароити муосир мушкилоти асосии соҳа омодасозии кадрҳо вобаста ба талаботи бахшҳои иқтисод мебошад. Барои беҳтар гардидани малакаи менеҷерони оянда дар макотиби олӣ таълим бо таҳқиқот ва амалия бояд тавъам бошад. Махсусан, доштани донишҳои назариявии алоқаманд ба таҷриба дар самти идоракунӣ, қобилияти хуби ҳамкорӣ ва муносибат барои онҳо нақши асосӣ доранд. Аммо, аз тарафи дигар, соҳаи менеҷмент ҳамчун бахши афзалиятноки иқтисодӣ аз сӯйи соҳибкорони истеҳсолӣ ва роҳбарони корхонаҳо хуб дарк нашудааст. Мутахассисони соҳа ба кор дар корхонаҳо ва ташкилотҳо ҷалб нагардида, оҳиста – оҳиста аз фаъолияти тахассусӣ берун рафтанд. Ҳол он ки кишвари мо аз сохти сотсиалистӣ пурра ба иқтисоди бозоргонӣ гузашт. Ҳама гуна шохаҳои иқтисодӣ, бавижа соҳибкории истеҳсолӣ бояд аз дидгоҳи менеҷерон дур намонанд. Зеро менеҷери хуб дар ҳама соҳа натиҷаи корро бештар месозад. Идоракунии хуб, ояндабинии дақиқ ва идеяву пешниҳоди бамаврид метавонанд иқтисодиёти кишварро аз ҳар гуна хатарҳо эмин нигоҳ доранд ва баҳри татбиқи консепсияҳои гуногун имконият фароҳам оваранд.
Муҳаққиқони бахши менеҷмент иброз доштанд, ки дар Тоҷикистон соҳа марҳилаи рушдро аз сар мегузаронад ва тайёр намудани кадрҳо ба роҳи азхуднамоии усулҳои муосир роҳандозӣ гардидааст. Мутахассисони ватанӣ кӯшиш доранд, ки назарияи анъанавии идоракуниро омӯхта, роҳҳои устувор ва самараноки истеҳсолотро самти кори хеш қарор диҳанд. Ҳамчунин, мавзӯъҳои имкониятҳои менеҷмент дар кишвар, рушди стратегияи миллӣ, принсип ва усулҳои идоракунӣ дар шароити муосир, моҳияти менеҷменти молиявӣ ва аҳамияти он бояд амиқ баррасиву таҳлил карда шаванд.
Мақсади баррасии масъалаҳои марбут ба менеҷмент дар асоси таҷрибаи ҷаҳонӣ ва бо назардошти хосиятҳои миллӣ ташаккул додани низоми самараноки менеҷменти Тоҷикистон мебошад.
Ширкатдорони конфронс тасмим гирифтаанд, ки натиҷаи таҳқиқот ва музокираҳои илмӣ бо фарогирии таҷриба барои натиҷагирӣ бо пешниҳодҳои мушаххас ба мақомоти дахлдори давлатӣ ирсол гардад.
Ташрифулло САЪДУЛЛОЕВ,
«Ҷумҳурият»
Баёни ақида (0) Санаи нашр: 24.12.2015 №: 256 Мутолиа карданд: 1580
