мулоқотҳо
Сафирон нақши Тоҷикистонро
дар таъмини амният муҳим донистанд
26 май Президенти Ҷумҳурии Тоҷикистон Эмомалӣ Раҳмон як гурӯҳ сафирони давлатҳои аъзои Созмони амният ва ҳамкории Аврупоро ба ҳузур пазируфт. Дар мулоқот масоили кунунӣ ва дурнамои ҳамкориҳои гуногунҷанбаи Тоҷикистон бо ин созмони бонуфузи ҷаҳонӣ баррасӣ шуданд.
Сардори давлат Эмомалӣ Раҳмон аз ҳамкории 17 –солаи Тоҷикистон бо Созмони амният ва ҳамкории Аврупо изҳори қаноатмандӣ карда, ба он аз номи мардуми кишвар барои кӯмакҳои зиёди дар солҳои вазнини гузашта расондааш арзи сипос намуд. Ба Бюрои Созмони амният ва ҳамкории Аврупо табдил ёфтани Маркази он дар шаҳри Душанберо Сардори давлат лаҳзаи гузариш аз як давра ба давраи дигари ҳамкорӣ маънидод карда, аз ҷумла таъкид дошт, ки «ин бозгӯ аз дурнамои умедбахши муносибатҳои мо аст».
Сафирон нақши Тоҷикистонро дар таъмини амнияту субот дар минтақаи Осиёи Марказӣ, аз ҷумла дар идораи муносибатҳои сарҳадӣ басо муҳим арзёбӣ намуда, изҳор доштанд, ки Созмони амният ва ҳамкории Аврупо аз ҳамаи тадбиру ташаббусҳои накӯи ин кишвар дар самтҳои гуногуни ҳамкорӣ дастгирӣ мекунад.
Ифтитоҳи Коллеҷи фармондеҳии сарҳадии Созмони амният ва ҳамкории Аврупо, ки 27 май дар шаҳри Душанбе сурат мегирад, натиҷаи муҳими ҳамкории босамари ду ҷониб маънидод гардид.
Дар мулоқот ҳамчунин оид ба ҳамкориҳо дар самтҳои демократикунонии ҷомеа, аз мина ва дигар моддаҳои тарканда тоза кардани ҳудуди Тоҷикистон, татбиқи лоиҳаҳои иқтисодӣ, рушди ҳамкориҳои минтақавӣ дар Осиёи Марказӣ ва оид ба авзои кунунию дурнамои рушди Афғонистон гуфтугӯ сурат гирифт.
х х х
Мара Маринакӣ, роҳба-ри ҳайати сафирони давлатҳои аъзои Созмони амният ва ҳамкории Аврупо, пас аз дидору гуфтугӯ бо Эмомалӣ Раҳмон, Президенти Ҷумҳурии Тоҷикистон, ба намояндагони воситаҳои ахбори омма иттилоъ дод, ки сафирон бо Ҷаноби Олӣ масоили вобаста ба рушди ҳамкориҳои мутақобилан судманди САҲА бо Тоҷикистон, таҳкими сарҳади давлатӣ, рафти татбиқи барнома ва лоиҳаҳои дар кишвари шумо татбиқшавандаро матраҳ намуданд. Эмомалӣ Раҳмон аз муносибатҳои байни Тоҷикистону САҲА изҳори қаноатмандӣ карда, таъкид ба амал овард, ки дар Тоҷикистон барои тавсеаи ҳамкориҳо заминаи боэътимод гузошта шудааст.
М. Маринакӣ ҳамзамон иттилоъ дод, ки дар вохӯрӣ оид ба ифтитоҳи расмии Коллеҷи фармондеҳии сарҳадии САҲА дар шаҳри Душанбе сухан рафт. Коллеҷи мазкур дар оянда ҷиҳати тарбияи кадрҳои баландихтисоси нерӯҳои сарҳадӣ ва таҳкими сарҳади давлатии Тоҷикистон мусоидат хоҳад кард.
Роҳбари гурӯҳи сафирон махсус таъкид сохт, ки «Тоҷикистон дар таҳким ва идораи муносибатҳои сарҳадӣ, ба вижа дар минтақаи Осиёи Марказӣ нақши муҳим мебозад. Аз ин рӯ, САҲА дар ин самт Тоҷикистонро барои пиёда сохтани аҳдоф ва ташаббусҳои наҷибаш ҳамаҷониба дастгирӣ менамояд».
М. Маринакӣ иброз дошт, ки ман ба ҳайси намояндаи доимии Юнон дар САҲА ба Президент Эмомалӣ Раҳмон паём ва таманниёти неки вазири корҳои хориҷии кишварамро расондам. Зикр гашт, ки охири соли равон сафари расмии ҷаноби вазир ба Тоҷикистон дар назар аст. Бовар дорем, ки ин сафар дар рушди муносибатҳои байни Юнону Тоҷикистон, инчунин САҲА ва кишвари шумо такони ҷиддӣ мебахшад.
Додоҷон Рӯзиев,
«Ҷумҳурият»
Баёни ақида (0) Санаи нашр: №: Мутолиа карданд: 2253
