маориф
ВАЗИРИ КИШОВАРЗӢ ХАТМКАРДАҲОРО БО КОР ТАЪМИН КАРД
- Ду сол боз қабули донишҷӯён ба мактабҳои олии кишвар, аз ҷумла ба Донишгоҳи аграрии Тоҷикистон тавассути Маркази миллии тестии назди Президенти Ҷумҳурии Тоҷикистон амалӣ мегардад ва натиҷаҳо нишон доданд, ки сатҳи дониши онҳо нисбат ба донишҷӯёни солҳои қаблӣ хеле беҳтар аст, - иброз дошт Амонулло Салимов, ректори Донишгоҳи аграрии Тоҷикистон ба номи Шириншоҳ Шоҳтемур, дар нишасти матбуотӣ.
Назар ба гуфтаи ректор, соли гузашта беш аз 24 ҳазор довталаб ихтисосҳои гуногуни донишгоҳро интихоб намуда, номнавис шуданд, ки нисбат ба соли қаблӣ 7 ҳазор нафар зиёд буд.
Моҳи майи соли гузашта вохӯрии вазири кишоварзӣ Зокирзода Маҳмадтоир бо иштироки сардорони идораҳои кишоварзии шаҳру ноҳияҳо ва роҳбарони муассисаву корхонаҳои зертобеи вазорат бо хатмкунандагони донишгоҳ баргузор гардид. Ин вохӯрӣ барои бештар бо ҷои кор таъмин гардидани хатмкунандагон мусоидат кард.
Инчунин, зикр гардид, ки ҳар рӯзи шанбе устодону кормандон ва донишҷӯён дар саҳни донишгоҳ, биноҳои таълимӣ, хобгоҳҳо ва майдончаҳои гирду атрофи онҳо шанбегиҳо гузаронда, ба корҳои ободонию кабудизоркунӣ машғуланд. Аз ҳисоби ниҳолхонаи донишгоҳ дар Боғи фарҳангию истироҳатии ба номи Садриддин Айнӣ зиёда аз 70 ниҳоли ҳамешасабзу сояафкан шинонданд.
Мунаввари САФАР
Баёни ақида (0) Санаи нашр: 16.01.2016 №: 11 Мутолиа карданд: 1282
