мулоқотҳо
Шамшод Ахтар:
"АЗ ДИДОР БО ҶАНОБИ ПРЕЗИДЕНТ ИФТИХОР ДОРАМ"
Асосгузори сулҳу ваҳдати миллӣ - Пешвои миллат, Президенти Ҷумҳурии Тоҷикистон Эмомалӣ Раҳмон 5 феврал муовини Дабири кулли Созмони Милали Муттаҳид, котиби иҷроияи Комиссияи иқтисодӣ ва иҷтимоии СММ барои кишварҳои Осиё ва Уқёнуси Ором (ЭСКАТО) хонум Шамшод Ахтарро ба ҳузур пазируфт.
Бино ба гузориши Хадамоти матбуоти Президенти ҷумҳурӣ, дар мулоқот масоили ҳамкории иқтисодию иҷтимоии Тоҷикистону Созмони Милали Муттаҳид мавриди баррасӣ қарор дода шуд. «Тоҷикистон ҳамкории судмандро бо ҳама сохторҳои дахлдори Созмони Милал, бавижа бо Комиссияи иқтисодӣ ва иҷтимоии созмон барои кишварҳои Осиё ва Уқёнуси Ором фаъолона ва пайгирона идома хоҳад дод», - таъкид кардааст дар ҷараёни суҳбат Президенти Ҷумҳурии Тоҷикистон Эмомалӣ Раҳмон.
Муовини Дабири кулли Созмони Милали Муттаҳид хонум Шамшод Ахтар баъд аз суҳбат бо Президенти Ҷумҳурии Тоҷикистон дар ҳузури хабарнигорон оид ба натиҷаҳои ин мулоқот ибрози назар намуд. - Бо Президенти Ҷумҳурии Тоҷикистон мулоқоти фарогир анҷом додем ва аз чунин як дидору суҳбат бо Ҷаноби Президент ифтихор дорам. Ман Комиссияи иқтисодӣ ва иҷтимоии СММ барои кишварҳои Осиё ва Уқёнуси Ором (ЭСКАТО) - ро намояндагӣ мекунам, ки он пули иртибот ва тамос байни ҳукуматҳост. Дарёфту татбиқи василаҳои муваффақонаи расидан ба Ҳадафҳои рушди устувор яке аз вазифаҳои меҳварии комиссияи мо мебошад, - гуфт хонум Шамшод Ахтар.
Ба гуфтаи ин меҳмони олимақом, дар мулоқот атрофи ҷамъбасти натиҷаҳои конфронси душанбегӣ оид ба татбиқи Даҳсолаи байналмилалии амалиёти «Об барои ҳаёт» дар солҳои 2005-2015», иқдоми навбатии Тоҷикистон барои расидан ба Ҳадафҳои рушди устувор, ҷаласаи 10-уми Шӯрои Барномаи махсуси СММ барои иқтисоди Осиёи Марказӣ дар Душанбе, инчунин дарёфти роҳҳои ҳалли мушкилоти ҷумҳуриҳои Осиёи Марказӣ ва кишварҳои маҳсур дар хушкӣ табодули назар сурат гирифтааст.
Фирӯзи РАҲМОНИЁН, «Ҷумҳурият»
Баёни ақида (0) Санаи нашр: 6.02.2016 №: 26 Мутолиа карданд: 4940
