порлумон
ҶАРИМА БА СИФАТИ ҶАЗОИ АЛТЕРНАТИВӢ
Дар ҷаласаи Маҷлиси намояндагон лоиҳаи Қонуни Ҷумҳурии Тоҷикистон «Дар бораи ворид намудани тағйиру иловаҳо ба Кодекси ҷиноятии Ҷумҳурии Тоҷикистон» ба тасвиб расид.
Идрисзода Илёс, муовини директори Агентии назорати давлатии молиявӣ ва мубориза бо коррупсия, зимни баррасии лоиҳаи мазкур иброз дошт, ки қонунгузории ҷиноятии Ҷумҳурии Тоҷикистон барои содир намудани ҷиноятҳои дар моддаҳои 319, 320 ва 321 ҷазои маҳрум сохтан аз озодиро ба сифати ҷазои асосӣ ва ҷазои маҳрум кардан аз ҳуқуқи ишғоли мансабҳои муайянро ба сифати ҷазои иловагӣ муқаррар кардааст.
Таҳлилу таҷрибаи тафтишотӣ ва судии ҷиноятии Ҷумҳурии Тоҷикистон нишон медиҳад, ки барои ҷамъият хавфнок будани шахсони содиркунандаи ҷиноятҳои дар моддаҳои мазкур пешбинишуда баъди аз мансаби ишғолкарда озод ва ё аз ҳуқуқи ишғоли ин мансабҳо маҳрум кардани онҳо аз байн меравад. Дар ин замина таъйин намудани ҷазои маҳрум сохтан аз озодӣ ва нигоҳ доштани чунин шахсон дар муассисаҳои ислоҳӣ ба мақсад мувофиқ нест ва харҷи зиёди молиявиро тақозо мекунад.
Татбиқи ҷазои ҷарима бо ин категорияи ҷиноятҳо нишон медиҳад, ки таъйини чунин ҷазо барои ислоҳи шахсони ҷиноятсодирнамуда ва пешгирии ҷиноятҳои нав мусоидат мекунад. Бинобар ин, дар лоиҳа пешниҳод мегардад, ки ба моддаҳои мазкур ҷазои ҷарима ба сифати ҷазои алтернативӣ ворид шавад.
Вакилони Маҷлиси намояндагон, ҳамчунин масъалаи ба кодекси мазкур ворид намудани моддаи нав - 1421 - ро баррасӣ карданд. Назар ба гуфтаи Мавлуда Қаландарзода, вакили порлумон, ин модда оид ба муқаррар намудани ҷавобгарии ҷиноятӣ барои содир намудани алоқаи ҷинсӣ ё дигар ҳаракатҳои дорои хусусияти шаҳвонӣ, ки бо суистифода аз эътиқоди динии ҷабрдида ё дар ҷараёни табобати ғайрианъанавӣ содир шудааст, бо маҳрум сохтан аз озодӣ ба муҳлати аз 3 то 7 солро пешбинӣ мекунад.
Қабул гардидани он барои огоҳонидан ва пешгирӣ кардани зуҳуроти номатлубе, ки ба арзишҳои дини мубини ислом иснод меоранд ва ҳуқуқу озодиҳои шаҳрвандонро поймол месозанд, равона гардидааст.
Зикр гардид, ки як рӯзи ҳабс ба 200 сомонӣ баробар буда, дар ҳолати пардохт кардани маблағ гунаҳгор зиндонӣ намешавад.
Мунаввари САФАР,
«Ҷумҳурият»
Баёни ақида (0) Санаи нашр: 13.02.2016 №: 31 Мутолиа карданд: 10990
