порлумон
ИТТИЛОИЯ
Дар ҷаласаи Маҷлиси намояндагони Маҷлиси Олӣ созишномаҳои грантӣ ва қарзӣ оид ба Лоиҳаи тақвияти таҳсилоти касбии техникӣ ва омӯзиш байни Ҷумҳурии Тоҷикистон ва Бонки осиёии рушд ба тасвиб расиданд.
Сумангул Тағойзода, вазири меҳнат, муҳоҷират ва шуғли аҳолии Ҷумҳурии Тоҷикистон, иброз дошт, ки ҳалли масоили шуғли аҳолӣ, омода кардани мутахассисони ҷавобгӯ ба талаботи бозори меҳнати дохилӣ ва хориҷӣ, ба роҳ мондани азхудкунии касбу ҳунарҳои муосир яке аз самтҳои афзалиятноки Ҳукумати Ҷумҳурии Тоҷикистон мебошад. Вазорат бо мақсади иҷрои дастуру супоришҳои Асосгузори сулҳу ваҳдати миллӣ - Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон дар асоси ризоияти Ҳукумати Ҷумҳурии Тоҷикистон ҷиҳати тақвияти системаи маълумот ва омӯзиши касбии техникӣ, беҳтар кардани заминаи моддию техникии муассисаҳои касбии техникӣ ва баланд бардоштани сатҳ ва сифати таълим аз соли 2014 дар ҳамкорӣ бо мутахассисони Бонки осиёии рушд лоиҳаи ин созишномаҳоро омода намуд ва моҳи ноябри соли гузашта ин ҳуҷҷатҳои муҳим ба имзо расиданд.
Назар ба гуфтаи Сумангул Тағойзода, дар доираи созишномаҳо ҳаҷми маблағгузории лоиҳа 34 миллион долларро ташкил медиҳад, ки аз он 15 миллион доллар қарзи имтиёзнок ва 15 миллион доллар ҳамчун грант аз ҳисоби Бонки осиёии рушд мебошад. Инчунин, барои татбиқи лоиҳаи мазкур 2 миллион доллар аз ҳисоби хазинаи «Неруи тозагӣ» ҷудо шуда, 2 миллион доллар ҳиссаи Ҳукумати Ҷумҳурии Тоҷикистон мебошад.
Мақсади асосии лоиҳа тақвияти методологияи сохтори маълумоти касбии техникӣ ва таълими калонсолон, таъмири асосии инфрасохтори таълимгоҳҳои интихобшуда, беҳтар намудани дастрасӣ ба барномаҳои муҳими муассисаҳои маълумоти касбии техникӣ, пурзӯр кардани менеҷмент ва роҳбарии соҳа мебошад.
Лоиҳаи мазкур барои татбиқи босамари Барномаи давлатӣ оид ба ислоҳоти системаи маълумоти касбии техникӣ барои солҳои 2013-2020 мусоидат мекунад.
Мавсуф зикр кард, ки оғози лоиҳа моҳи марти соли равон ба нақша гирифта шуда, анҷомаш 31 марти соли 2021 муайян шудааст.
Маводи таълимӣ, барои ихтисосҳои афзалиятнок, дар 29 муассисаи интихобшудаи касбии техникӣ ҷорӣ мешаванд.
Шукурҷон Зуҳуров, Раиси Маҷлиси намояндагон, масъалаи беҳтар намудани таҳсилоти касбии техникӣ ва тайёр кардани кадрҳои ҷавобгӯ ба талаботи хоҷагии халқи мамлакатро хеле муҳим арзёбӣ кард.
Мунаввари САФАР, «Ҷумҳурият»
Баёни ақида (0) Санаи нашр: 11.03.2016 №: 49 Мутолиа карданд: 11137
