номаҳо
БАҲСҲО КАЙ АНҶОМ МЕГИРАНД?
БОЗ ДАР БОРАИ ХИЗМАТРАСОНИИ НАҚЛИЁТӢ
Субҳи ҷумъаи 11 марти соли 2016, яъне ҳангоми ба кор рафтанам, ба нақлиёте, ки навиштаи «ЦУМ – Қараболо» - ро дошт, нишастам. Дар он 4 нафари дигар низ буд. Ман 3 сомонӣ додаму «то Сирк», гуфтам. Ронанда як сомонӣ бақия дод. Аз ӯ пурсидам, ки чаро ду сомонӣ гирифтӣ, охир то ними роҳ 80 дирам аст-ку? Дағалона ҷавоб дод: «Соли 2013 роҳкиро 1 сомонию 60 дирам буду гузашт, шумо аз ҳама қафо мондаед… Ба наздикӣ боз қиматтар мешавад, баъд чӣ кор мекунед?... Ин кори мо аст. Ман аз шумо пули таъмиру «запчаст» (қисмҳои эҳтиётӣ) талаб накардаам - ку ….». Ва боз чандин суханони таҳқиромез гуфт. Пас аз он 40 дирам бақия дод. Он маршруткаи рақами 12 ба Турсунов М. К. тааллуқ дорад. Навишта шуда буд, ки рақамҳои телефонаш 918 - 80 - 33 - 03 мебошад. Ҳамон лаҳза барои санҷиш ба рақамаш занг задам, ки худаш бардошт. Рақами давлатии нақлиёт 1981ТТ 05 буд. Хатсайраш агарчӣ рақами дувоздаҳро нишон медод, лекин аз сӯи бозори «Корвон» ба тарафи Беморхонаи Қарияи боло ва Фурӯшгоҳи марказӣ («ЦУМ») ҳаракат мекард. Чунин мисолҳоро, мутаассифона, зиёд овардан мумкин аст. Баҳсу ҷанҷол дар ин гуна мавридҳо на ба нафъи мусофирон мебошаду на ронандагон. Балки он ба тандурустӣ ва ҳолати равонии ду ҷониб таъсири манфӣ мерасонад. Аз ин рӯ, фикр мекунам, ки масъулон дар рафъи камбудиҳои ҷойдошта бояд сари вақт ва бо эҳсоси масъулият саҳм бигиранд.
С. АЛИМОВА,
шаҳри Душанбе
Баёни ақида (0) Санаи нашр: 6.04.2016 №: 66 Мутолиа карданд: 7332
