номаҳо
ДАРХОСТ АЗ МАҚОМОТИ ДАХЛДОР
Соли 1997 ба Абдушукур Ниёзов ба шавҳар баромадам. Ӯ ба сол аз ман хеле калон буд. Дар рӯзҳои аввал зиндагиамон хуш мегузашт. Нисбат ба ман ғамхорию меҳрубонӣ менамуд. Аз ин издивоҷ як духтар ба дунё омад. Алҳол ӯ дар синфи 7-уми муассисаи таҳсилоти миёнаи умумӣ мехонад.
Вале зиндагии хуби мо ба фарзандони шавҳарам писанд наомад. Хусусан, фарзанди калониаш Акбар бо ҳамсараш Зайнура мехостанд падарашон маро бо духтарам ҷавоб диҳад. Чандин бор дастбагиребон ҳам шудем. Ҷароҳат бардоштам. Маҷбур шудам, ки барои табобат дар беморхона бистарӣ шавам. Шавҳари 90-солаам дар ин ҳол фарзандонашро ҷонибдорӣ кард ва маро талоқ дод.
Писари дигари ӯ - Валӣ низ зиндагиямро талх месозад.
Ин фарзандон худ дар хонаҳои боҳашамат зиндагӣ мекунанд, аммо падарро дар хонае ҷой додаанд, ки шароити муқаррарӣ барои зистан надорад. Ману духтарам дар хоначае зиндагӣ дорем, ки шароитҳояш аз хонаи падари духтарам бадтар мебошад. Борҳо дар ин хусус ба мақомоти дахлдор муроҷиат намудам, аммо на ҳамаи онҳо ба доди ман расиданд. Танҳо аз собиқ раиси суди ноҳияи Сино миннатдор ҳастам, ки дар ҳалли масъала аз рӯи адолат рафтор намуд. Яъне, дар сурати маро аз хона баровардан барои харидории хона барои ману хоҳарашон бояд 20 ҳазор доллар бидиҳанд. Аммо ин фарзандон хонаи моро ба фурӯш гузошта, мегӯянд, ки пас аз он ба ману хоҳарашон 100 доллар медиҳанду халос. Ҳеҷ намеандешанд, ки ману падари онҳо ақди никоҳи расмӣ дорем ва дар дафтарчаи ҳавлӣ номнавис шудаем. Инчунин маҷбурамон месозанд, ки худамон ихтиёран аз ҳавлӣ баромада равем. Борҳо барои расидан ба ин мақсад таҳдиди куштанам низ карданд. Аз мақомоти дахлдор хоҳиш мекунам, ки дар ҳалли мушкилотам дасти мадад дароз намоянд.
Сайпочоҳ ҲАБИБОВА, ноҳияи Сино,
кӯчаи Нахимов, 16/2
Баёни ақида (0) Санаи нашр: 8.04.2016 №: 68 Мутолиа карданд: 7694
