номаҳо
ХИДМАТРАСОНИИ ТИББӢ БЕҲТАР ГАРДИД
Рустам Нидоев аз зумраи табибони ҳозиқест, ки дар ноҳия аз маҳбубияти хоса бархӯрдор аст. Ӯ бо муносибати неку меҳнати софдилона дар миёни мардум дар андак муддат маъруф ва соҳибобрӯ гардид.
Мавсуф соли 1992, пас аз хатми Донишгоҳи давлатии тиббии Тоҷикистон ба номи Абуалӣ ибни Сино ба ноҳия баргашт ва фаъолияташро дар беморхонаи марказӣ оғоз бахшид. Ӯро зимни кори пурсамараш дарёфтанд, ки на танҳо мутахассис ва донандаи хуби соҳа аст, балки ташаббускор низ мебошад. Аз ин рӯ, дар дармонгоҳи тозабунёди Ҷамоати деҳоти Нӯшор сардухтур таъйин карданд. Сарвари нав вазъи соҳаро дар ҷамоати деҳот бори дигар бо тамоми паҳлуҳояш омӯхт ва онро бо кормандон мавриди баррасии ҷиддӣ қарор дод. Робитаи мутахассисон бо аҳолӣ, хоса бо беморон пурқувват гардид. Барои пешгирии бемориҳои сироятӣ тадбирҳои зарурӣ андешида шуданд. Кормандони соҳа вазифадор гардиданд, ки истифодаи дурусти дастгоҳҳои замонавӣ ва дигар таҷҳизоти муосирро биёмӯзанду аз худ кунанд.
Баъдҳо дар ин ҷо бинои иловагӣ сохта шуд, ҳуҷраҳои беморон ва миқдори катҳоро зиёд карданд. Таваллудхона низ бунёд гардид. Беморхона соҳиби мошини ёрии таъҷилӣ ва дастгоҳҳои замонавию таҷҳизоти муосир гашт. Ба ин ҷо беморон ва мардум барои табобату аз муоинаи тиббӣ гузаштан аз дигар деҳоти ҷамоатҳо низ меоянд.
Ҳамин тавр, сарвари беморхона саъю кӯшиши зиёд ба харҷ медиҳад, то бо фароҳам овардани имконҳо сатҳи хидматрасонии тиббиро боз ҳам беҳтар намояд.
Давлатхоҷаи МИЗРОБ, ноҳияи Тоҷикобод
Баёни ақида (0) Санаи нашр: 3.06.2016 №: 106 Мутолиа карданд: 11089
