мулоқотҳо
ТАШРИФИ ҲАЙАТИ БОНКИ АВРУПОИИ ТАҶДИД ВА РУШД
1 июл Асосгузори сулҳу ваҳдати миллӣ - Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон дар Қасри миллат ҳайати Шӯрои директорони иҷроияи Бонки аврупоии таҷдид ва рушдро ба ҳузур пазируфта, аз сатҳи ҳамкории Тоҷикистон бо ин ташкилоти молиявӣ изҳори қаноат кард ва ташрифи ҳайати бонуфузи бонкро омили муҳими таҳкими робитаҳо маънидод намуд.
Ҷонибҳо аз таъсири манфии буҳронҳои сиёсиву молиявӣ ба иқтисодиёти кишварҳо изҳори нигаронӣ карда, доир ба дарёфти роҳҳои ҳалли ин мушкилот табодули афкор намуданд.
Дар ҷараёни мулоқот масъалаи густариши робитаҳо дар соҳаҳои мухталифи иқтисодиёти кишвар, аз ҷумла энергетика, рушди соҳибкорӣ, низоми бонкӣ ва инфрасохтори шаҳрӣ, низ баррасӣ гардид.
Изҳори умед карда шуд, ки ҷалби бештари сармояи ташкилотҳои молиявии байналмилалӣ ба низоми молиявии кишвар такони ҷиддӣ бахшида, дар солимгардии низоми бонкӣ ва рушди иқтисодиёт нақши мусбат хоҳад бозид.
Иштироки Бонки аврупоии таҷдид ва рушд дар татбиқи лоиҳаҳои дорои аҳамияти минтақавӣ зарур шумурда шуда, амалӣ кардани лоиҳаи CАSА - 1000 намунаи олии ин ҳамкорӣ маънидод гардид.
Баёни ақида (0) Санаи нашр: 2.07.2016 №: 130 Мутолиа карданд: 8871
