мулоқотҳо
МУЛОҚОТИ ЭМОМАЛӢ РАҲМОН БО МАРИАМ ШЕРМАН
14 июл дар Қасри миллат Асосгузори сулҳу ваҳдати миллӣ - Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон иҷрокунандаи вазифаи директори минтақавии Бонки ҷаҳонӣ оид ба Осиёи Марказӣ хонум Мариам Шерманро ба ҳузур пазируфт.
Дар мулоқот вазъи кунунӣ ва дурнамои муносибатҳои дуҷонибаи Тоҷикистон ва Бонки ҷаҳонӣ мавриди баррасӣ қарор дода шуд.
Сарвари давлат муҳтарам Эмомалӣ Раҳмон ташрифи ҳайати баландпояи бонки мазкурро ба Тоҷикистон иқдоми муҳим дар таҳкими ҳамкории ҷонибҳо арзёбӣ карда, ба фаъолияти имрӯзаи Бонки ҷаҳонӣ дар Тоҷикистон баҳои баланд дод.
Ҳамкории дуҷонибаи Тоҷикистон ва Бонки ҷаҳонӣ дар соҳаҳои гуногуни рушд, пеш аз ҳама, дар соҳаҳои энергетика, инфрасохтор, кишоварзӣ, дастгирии Буҷети давлатӣ, соҳаҳои иҷтимоӣ ва дигар соҳаҳои афзалиятнок дар сатҳи зарурӣ ба роҳ монда шуда, доираи бештару фарохтарро фаро мегирад.
Зимни вохӯрӣ оғози татбиқи лоиҳаи минтақавии интиқоли неруи барқи CASA - 1000, ки дар якҷоягӣ бо Бонки ҷаҳонӣ амалӣ мегардад, намунаи олии ҳамкории судманди дуҷониба арзёбӣ гардида, изҳори умед карда шуд, ки бо ёрии Бонки ҷаҳонӣ дар оянда татбиқи лоиҳаҳои бахши энергетикӣ, сохтмони иқтидорҳои истеҳсолкунанда ва хатҳои интиқоли барқ, рушди нақлиёт ва инфрасохтори роҳ, аз ҷумла роҳи оҳан дар Ҷумҳурии Тоҷикистон тақвият бахшида мешавад.
Дар мулоқот масъалаҳои тадқиқоти асосноккунии иқтисодию техникии барқарорсозии НБО - и Норак, дарёфт намудани маблағҳои иловагӣ барои лоиҳаи таҷдиду барқарорсозии неругоҳи Норак, лоиҳаҳои барқарорсозӣ ва соҳилмустаҳкамкунии дарёҳо баррасӣ гардиданд.
Ҷонибҳо ҳамчунин доир ба тақвияти ҳамгироии муштарак дар самти кам кардани таъсири омилҳои берунӣ ба иқтисодиёти Тоҷикистон дар шароити шиддат гирифтани буҳрони ҷаҳонии иқтисодию молиявӣ ва расондани ёрӣ ба кишвари мо дар бартарафсозии оқибатҳои офатҳои табиӣ табодули назар карда, мулоқоти имрӯзаро барои муҳокимаи масъалаҳои вобаста ба вазъ ва дурнамои ҳамкории мутақобила муҳим ва саривақтӣ арзёбӣ намуданд.
Баёни ақида (0) Санаи нашр: 16.07.2016 №: 137 Мутолиа карданд: 8968
