мулоқотҳо
МУЛОҚОТИ ЭМОМАЛӢ РАҲМОН БО ЛИЛИЯ БУРУНЧУК
12 август дар Қасри миллат Асосгузори сулҳу ваҳдати миллӣ - Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон директори кишварии Бонки ҷаҳонӣ оид ба Осиёи Марказӣ хонум Лилия Бурунчукро ба ҳузур пазируфт.
Дар мулоқот вазъ ва дурнамои ҳамкории Тоҷикистон ва Бонки ҷаҳонӣ дар соҳаҳои энергетика, инфрасохтор, кишоварзӣ, дастгирии буҷети давлатӣ, иҷтимоӣ ва дигар бахшҳои афзалиятнок мавриди баррасӣ қарор дода шуданд.
Сарвари давлати Тоҷикистон муҳтарам Эмомалӣ Раҳмон вохӯрии имрӯзаро иқдоми муҳим дар таҳкими ҳамкорӣ байни Ҷумҳурии Тоҷикистон ва Бонки ҷаҳонӣ арзёбӣ намуда, изҳор дошт, ки ҳар як лоиҳаи якҷоя бо бонк татбиқшаванда боз як пешрафти дигар дар рушди иқтисодии Тоҷикистон ва баланд бардоштани сатҳи зиндагии мардуми он мебошад.
Дар давоми 23 соли шарикӣ Бонки ҷаҳонӣ ба Тоҷикистон зиёда аз як миллиард доллари амрикоӣ қарзҳои имтиёзнок, грантҳо ва ёрии техникӣ пешниҳод намуда, айни замон дар кишвари мо лоиҳаҳои фаъоли бонк ба маблағи зиёда аз 350 миллион доллар дар бахшҳои гуногуни иқтисодӣ ва иҷтимоӣ амалӣ шуда истодаанд.
Дар мулоқот доир ба саҳмгузории муштарак дар бартарафсозии оқибатҳои офатҳои табиат дар шаҳру ноҳияҳои гуногуни мамлакат, кам кардани хатари таъсири буҳрони ҷаҳонии молиявию иқтисодӣ ба иқтисодиёти рушдёбандаи Тоҷикистон, идомаи маблағгузории таҷдиду барқарорсозии НБО Норак, рушди соҳаи нақлиёт ва инфрасохтори роҳ ва тақвияти ҳамкорӣ дар доираи Стратегияи панҷсолаи ҳамкории Бонки ҷаҳонӣ ва Тоҷикистон табодули афкори судманд сурат гирифт.
Ҷонибҳо ҳамчунин масоили зиёд намудани ҳаҷми маблағгузориҳои Бонки ҷаҳониро ба иқтисодиёти Тоҷикистон дар намуди маблағҳои имтиёзноки грантӣ мавриди баррасӣ қарор доданд.
Баёни ақида (0) Санаи нашр: 15.08.2016 №: 163 Мутолиа карданд: 10771
