номаҳо
АЗ СУДИ ОЛӢ ХОҲИШ ДОРАМ...
Редаксияи азиз, ба шумо сокини ноҳияи Шоҳмансури шаҳри Душанбе, кӯчаи Умед, хонаи 348 Стақурбон Қурбонов, мӯйсафеди 85 – сола ва маҷрӯҳи гурӯҳи якум муроҷиат менамояд.
Аз соли 1966 ин ҷониб дар ҳамин ҷо зиндагӣ мекунам. Дар ин муддат бо аҳли хонавода ва ҳамсояҳоям аҳлона зиндагӣ мекардем. Вале, ҳодисаҳои солҳои охир ба сарам омада маро маҷбур сохт, ки аз рӯи ҳамсояҳоям ба мақомоти гуногун, аз ҷумла ба рӯзномаи «Ҷумҳурият», шикоят барам.
Гап дар сари он аст, ки ҳамсояам Умар Раҳимов бо роҳҳои барои мо номаълум 28,0 метри мураббаъ қитъаи замини барои роҳрав ҷудошударо азхуд намуд. Шояд хонандаи азиз тааҷҷуб намояд, ки наход 28,0 метри мураббаъ замин кирои якдигарнофаҳмӣ бошад. Хоса, миёни ҳамсояҳои наздик. Охир дар урфият мегӯянд, ки ҳамсояи наздик беҳ аз хеши дур.
Вале, ана ҳамин ҳамсояи наздикамон ин миқдор заминро на аз ҳисоби заминҳои дигар, балки аз ҳисоби роҳрави хонаи ман ғасб намудааст. Дар натиҷа, роҳрави бе ин ҳам хеле танг боз ҳам тангтар шуд.
Баҳсу талошҳоямон ҳеҷ натиҷае ба бор наовард. Дар ин миён писари хурдиам Наҷмиддин Қурбонов бо сабаби беморӣ ногаҳон аз олам даргузашт. Мо ҳатто ҷисми ӯро дар тобут аз хона бароварда натавонистем. Маҷбур шудем, ки ҷасадро бо як азобе аз ин роҳрави танг гузаронда, сипас ба тобут монем…
Ман борҳо аз Умар Раҳимов хоҳишу илтиҷо кардам, ки қитъаи замини ғасбкардаашро ба ҳолати аввала баргардонда, роҳро кушояд. Вале ӯ ба ману хоҳишҳоям эътиборе надод.
Маҷбур шудам бо аризаи даъвогӣ ба суди ноҳияи Шоҳмансур муроҷиат намоям. Мутаассифона, суд даъвои маро рад кард ва суди шаҳрӣ низ онро бенатиҷа гузошт.
Тавассути рӯзномаи «Ҷумҳурият» ба Суди Олӣ ва Прокуратураи генералии Ҷумҳурии Тоҷикистон муроҷиат карда гуфтаниам, ки даъвои мани мӯйсафедро бори дигар холисона дида бароянд.
Баёни ақида (0) Санаи нашр: 27.09.2016 №: 192 Мутолиа карданд: 11425
