номаҳо
АЗ "ҶУМҲУРИЯТ" МИННАТДОРЕМ
Ассалому алайкум аҳли кормандони рӯзномаи “Ҷумҳурият”. Ман яке аз мухлисони рӯзномаи шумо мебошам. Санаи 30 сентябр дар коллеҷи технологии ба номи А. Қаҳҳорови шаҳри Конибодом конференсияи хонандагони рӯзномаи “Ҷумҳурият” баргузор гардид, ки дар он намояндагони рӯзнома низ ҳузур доштанд. Аз иштирокашон дар кори конфронс мо бисёр хушнуд ва сарфароз гардидем. Аз ин хотир, миннатдории худро ба сармуҳаррири рӯзнома ва аҳли эҷодии он мерасонам.
Дар бораи нашрияи “Ҷумҳурият” гуфтаниям, ки он имрӯз дар сархати рӯзномаҳои бонуфузи кишвар қарор дорад. Ин рӯзнома оинаи ҳаёти сиёсию иқтисодии ҷумҳурии мо ба ҳисоб меравад. Чӣ дар гузашта ва чӣ имрӯз рӯзнома сиёсати давлатии кишвари моро, ки барои баланд бардоштани вазъи некуаҳволии халқу мамлакат нигаронида шудааст, тарғиб менамояд. Дар ҳама давраҳои фаъолияти хеш нашрия чун минбари орзуву омол ва ормонҳои миллӣ баромад кардааст. Таърихи “Ҷумҳурият” саршори корнамоиҳост. Зеро ҳамеша талош доштааст, ки некиро тарғиб кунаду бадиро маҳкум. Дар шароити муосири муборизаи тамаддунҳо ва ҷаҳонишавӣ бештар маълум мегардад, ки рӯзномаи “Ҷумҳурият” дар ҳаёти ҷомеа чӣ гуна нақши бузург дорад. Инро метавон дар мисоли фаъолияти рӯзнома ва маводҳое, ки дар он нашр мешаванд ба риштаи таҳқиқ кашид.
Қонеъ будани мардум аз фаъолияти матбуот ба дараҷаи касбияти рӯзноманигор вобастагӣ дорад. Банда ҳам аз рӯи вазифа, ҳам аз рӯи меҳр ба рӯзнома қариб ҳамаи нусхаҳои “Ҷумҳурият” - ро мутолиа менамоям. Аз ҳар як шумораи он ду - се матлаби хонданбоб пайдо мекунам. Хусусан, ҳаводиси рӯзро бо воқеаҳои таърихӣ муқоиса намуда, маводҳои таҳлилии омоданамудаи рӯзноманигорон барои инҷониб писанд аст.
Ногуфта намонад, ки ҳамасола коллеҷи технологии ба номи А. Қаҳҳоров дар маъракаи обуна фаъолона иштирок намуда, махсусан ба нашрияи “Ҷумҳурият” бештар обуна мегарданд. Имсол ҳам мо аллакай обунаро ба рӯзномаи дӯстдоштаамон ташкил кардем. Тӯли солҳои охир теъдодаш зиёд шуда, муштариёнаш дар байни омӯзгорону донишҷӯён меафзояд.
Аз ин хотир, ман ба тамоми кормандони ин нашрияи бонуфуз, саломатӣ хоҳонам. Бигузор қаламашон ҳамеша бурро бошад. Бошад ки барои татбиқи нақшаҳои бунёдкоронаи Асосгузори сулҳу ваҳдати миллӣ - Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон софдилонаю содиқона фаъолият намоянд.
Дилрабо МАҲМУДОВА,
мудири китобхонаи коллеҷи технологии
ба номи А. Қаҳҳорови шаҳри Конибодом
Баёни ақида (0) Санаи нашр: 05.10.2016 №: 198 Мутолиа карданд: 10832
