Чанд нафар эҷодкорон бо кайфияти том ва хуррамии табъ рахти сафари шаҳри Гулистонро бастем. Бемуҳобот, шодмониамон канор надошт. Охир, чун анъанаи нек медонистем, ки ҳамасола 22 сентябр дар қаламрави   кишвари тозаистиқлолу созандаамон  Рӯзи  асосгузори адабиёти классики форсу тоҷик, устоди забардасту ҷаҳонгир Абуабдуллоҳи Рӯдакӣ васеъ ҷашн гирифта  мешавад. Баъди тай  намудани масофаи зиёд ба тарабгоҳи илҳомбахш расидем. Аммо гирду атрофи муҷассамаи Одам - уш - шуароро аз чорабинии адабии мунтазам ва ҳаводоронаш холӣ дида, диламон таҳ кашид. Хотири бе ҳамон ҳам маҳзунамонро  коғазпораҳои паҳну парешони он манзара боз ҳам маҳзунтар сохт.
Беихтиёр мурғи  хаёламон ба чаманзори ҳамин рӯзи мубораки ду сол қабл боли парвоз кушод.  Дар ин санаи муътабар иштирокдорон  аз эҷодиёти султони шоирон бо эҳсоси  эҳтирому таровати хоса шеъру ғазалҳояшро қироат мекарданд. Дар дидагони аксарияти тамошобинон анвори ифтихори беканори миллӣ аз соҳибият  ба чунин сухангустари бузург медурахшид. Аз шукӯҳу   шаҳомати ин чорабинӣ пиру барно завқ мебурданд. Он замон ба рушди фарҳанг, гузарондани шабҳои эҷодии шоирон, таҷлили муҳташами ин ҷашнвораи оммавӣ аҳамияти махсус дода мешуд. Навқаламон аз эҷодиёти хеш чакидаҳои хомаашонро пешкаши мухлисони каломи бадеъ менамуданд.
Дар раванди суҳбати сарироҳӣ фаҳмидем, ки санаи 21 сентябр дар кохи Истиқлоли шаҳри Гулистон бахшида ба рӯзи Рӯдакӣ  чорабинии кӯчаке бо ҷалби 40-50  нафар мактабхонҳо ба вуқӯъ   пайвастааст. Ҳайрониамонро боз  далели дигаре афзуд. Бо иттиллои хабарнигорон дар шаҳр ду сол инҷониб Рӯзи матбуоти тоҷик низ аз доираи истиқбол берун мондааст. Ин, албатта, аламовару ҳузнангез аст.