номаҳо
ЯК МАСЪАЛА. КӢ ДАР ҲАЛЛИ ОН КУМАК МЕКУНАД?
Чанд моҳ пеш аз ситоди ноҳиявӣ ва шаҳрӣ оид ба омодагӣ ба мавсими тирамоҳу зимистони солҳои 2016 – 2017 ба номам огоҳинома расид. Дар он омадааст: Муҳтарам соҳибмулк! Мутобиқ ба нақшаи истеҳсол ва интиқоли неруи гармӣ дар мавсими гармидиҳии солҳои 2016 – 2017 гармитаъминкунии бинои истиқоматии Шумо ба нақша гирифта шудааст. Бинобар ин, тибқи талаботи қонунгузории амалкунанда (Кодекси манзили Ҷумҳурии Тоҷикистон, Қонуни Ҷумҳурии Тоҷикистон «Дар бораи нигоҳдории биноҳои бисёрхонагӣ ва ШСМ») аз Шумо талаб карда мешавад, ки дар муҳлатҳои кӯтоҳтарин омода намудани системаи дохиликвартирагии гармитаъминкунӣ (радиаторҳо ва қубурҳои дохили квартира), инчунин дар ҳамбастагӣ бо соҳибмулкони дигари бино омода намудани системаи гармитақсимкунии биноро (стоякҳо, элеватор) таъмин намоед. Дар ҳолати акс нисбати Шумо тибқи санадҳои меъёрии ҳуқуқӣ чораҳои маъмурӣ, аз ҷумла ҷаримабандӣ андешида мешаванд».
Бори аввал буд, ки аз огоҳинома шод гардидам. Суръати хуби корро дар шаҳр медидаму ба дил мегуфтам: «Ҳатман аз аввали моҳи ноябри соли равон бо гармӣ таъмин мешавем». Баъдҳо сухан бештар аз миқдори маблағи барқарории қубурҳои пайвастшавандаи таҳхонаи бино мерафт. Нархи он дар забонҳо зуд – зуд тағйир меёфт ва, албатта, ин касро ба шубҳа гирифтор менамуд. Оқибат гуфтанд, ки аз ҳар хона ё худ барои ин кор бояд 380 – сомонӣ бисупоранд. Супоридем. Пас аз чанде изҳор доштанд, ки пул барои анҷоми корҳо камӣ кардааст, аз ин рӯ, он қатъ гардидаст.
Инчунин, баён доштанд, ки ба ҷои қубури қутраш 20 аз қубури қутраш 15 истифода кардаанд. Албатта, аз он рӯ бе тарсу бо дилпурӣ, ки ба ин ҷиҳати масъала назорат бурда намешавад. Барои ҷамъоварии ин миқдор маблағ (аз 54 ҳуҷраи як бино) ягон далелу ҳуҷҷат вуҷуд надорад Ҳеҷ ҳуҷҷати тасдиқкунандае нест, ки чӣ харида ва ба чӣ миқдор. Сардори баъзе аз хонаҳо бо иштироки намояндагон масолеҳи заруриро харидаанд. Онҳо нисбат ба мо пули камтар ҷамъ оварданду ҳамаи корҳоро сари вақт ба анҷом расонданд.
Гуфтанд, ки барои харидани масолеҳи зарурӣ дар дохили ҳар ҳуҷра 2400 сомонӣ зарур мебошад. 400 сомонии он ҳаққи хидмати усто аст. Агар ин дуруст бошад, устоҳо аз 54 ҳуҷраи як бино бояд соҳиби 21 600 сомонӣ бигарданд. Ҳуҷраи мо дар ошёнаи аз ҳама болои хона ҷой дорад. Маслиҳат доданд, ки аввал ошёнаҳои поёнӣ ба ин кор бояд шурӯъ намоянд. Аммо бархе аз онҳо изҳор медоранд, ки ин миқдор пул надоранд. Хуллас, як дарҳам - барҳамӣ аст, ки кас на сару нӯги онро меёбад, на ҳақиқаташро. Чӣ бояд кард? Ҳақ бар кадом ҷониб аст? Наход роҳи ҳалли масъала вуҷуд надошта бошад? Умуман, дар ин кор бояд масъулон назорат бибаранд. Ё нодуруст мегӯям?
Н. МИРХОҶАЕВ,
ноҳияи Синои шаҳри Душанбе
Баёни ақида (0) Санаи нашр: 25.10.2016 №: 212 Мутолиа карданд: 9385
