номаҳо
АЗ "ҶУМҲУРИЯТ" МИННАТДОРАМ
Ба гӯшаи «Шаҳрванд» - и рӯзномаи «Ҷумҳурият» нома ирсол кардам. Дар он сухан аз миқдори маблағи ҷамъоварда барои барқарорсозии қубурҳои пайвастшавандаи таҳхонаи бино мерафт. Зикр карда будам, ки нархи он дар забонҳо зуд – зуд тағйир меёфт ва ин моро ба шубҳа гирифтор менамуд. Оқибат барои анҷоми ин кор аз ҳар хона 380 сомонӣ ҷамъ оварданд. Ҳол он ки барои ҷамъоварии ин миқдор маблағ ягон далелу ҳуҷҷат вуҷуд надошт.
Ба ҷуз ин ёдовар шуда будам, ки хонаҳои дигар барои иҷрои чунин корҳо нисбат ба мо камтар маблағ ҷамъ оварда, ва масолеҳи заруриро харидаанд, албатта, бо иштироки намояндагон.
Ҷойи нигаронӣ бештар аз он буд, ки гӯё ҳамаи пулҳо барои барқарор ва васлу насб намудани қубурҳо ба пуррагӣ сарф гардидаанд, агарчи ба ҷойи қубурҳои қутраш 20 аз қубурҳои қутраш 15 истифода намудаанд.
Пас аз нашри номаам бо номи «Як масъала. Кӣ дар ҳалли он кумак мекунад?» («Ҷумҳурият», 25.10.2016 с.) кор тамоман ранги дигар гирифт, ба маънии мусбаташ. Ба ҳар соҳиби хона 100 сомонияш баргардонда шуд. Гурӯҳи махсуси назоратӣ омада, ба рафти анҷоми корҳо ошно гардиданд. Фикр мекунам, ки пас аз он кор дар бинои хонаи мо ба маҷрои худ медарояд, яъне дарҳамбарҳамӣ аз байн меравад ва масъулон минбаъд низ назоратро пурзӯр мекунанд. Аммо, аз рӯи шунидам ин масъала бо мураккабиҳои худ дар дигар ноҳияҳои шаҳри Душанбе низ вуҷуд дорад, ки ҳалли дуруст ва саривақтии худро хоҳон мебошад.
Ҳамин тавр, ба воситаи рӯзномаи дӯстдоштаам «Ҷумҳурият» таъсири сухани чопиро бад – ин зудӣ дидаму бисёр шод гаштам. Бо истифода аз мавриди муносиб ба аҳли эҷоди рӯзнома, ки онро ҷолибу хонданӣ ва таъсирпазир намудаанд, изҳори сипос менамоям.
Н. МИРХОҶАЕВ, ноҳияи Синои шаҳри Душанбе
Баёни ақида (0) Санаи нашр: 28.10.2016 №: 215 Мутолиа карданд: 9230
