президент
Машварат дар ҳузури Сардори давлат
20 июл Президенти Ҷумҳурии Тоҷикистон Эмомалӣ Раҳмон бо масъулони Ҳукумати мамлакат ва Дастгоҳи иҷроияи Сардори давлат, роҳбарони як қатор вазорату идораҳо ва дигар шахсони дахлдор машварати корӣ доир намуд.
Дар машварат масоили вобаста ба корҳои созандагию бунёдкорӣ, ҷамъоварии ҳосили зироатҳо ва тезондани кишти такрорӣ, иҷрои буҷети давлатӣ, таъмини кори пурсамари корхонаҳои саноатӣ, татбиқи лоиҳаҳои инвеститсионӣ, омодагӣ ба зимистон ва дигар масъалаҳо баррасӣ шуданд.
Оид ба рафти корҳои созандагию ободонӣ, аз ҷумла дар Вилояти Мухтори Кӯҳистони Бадахшон гузориши Сарвазири мамлакат Оқил Оқилов ва дигар шахсони масъул шунида шуд. Зикр гардид, ки бо супориши Президенти мамлакат Эмомалӣ Раҳмон ҳайати кории ҳукуматӣ бо рафти корҳои сохтмонӣ дар иншооти сершумори шаҳру ноҳияҳои ин вилоят шиносоии бевосита пайдо намуданд ва баҳри босуръат ва сифати баланд анҷом додани онҳо тадбирҳои зарурӣ андешиданд.
Сардори давлат Эмомалӣ Раҳмон оид ба ҷамъоварии беталаф ва саривақтии ҳосили фаровони ғалладона ва вусъати кишти такрорӣ дар заминҳои обӣ, таъмини иҷрои буҷети давлатӣ ва пардохти бетаъхири маошу нафақа ва кӯмакпулиҳо, омодагии ҷиддӣ ба зимистон ва дигар масъалаҳои баррасишуда ба масъулон супоришҳои мушаххас дод.
Аз ҷумла дастур дода шуд: дарави ғалладона ҳарчи зудтар анҷом дода , кишти такрорӣ тезонда шавад; омодагии ҷиддӣ ба зимистон таъмин гардад, аз ҷумла бо захираи фаровони ангишт, гази моеъ ва маводи ғизоӣ; сохтмони нақби Шаршар, азнавсозии роҳи мошингарди Қӯрғонтеппа - Дӯстӣ - Панҷи Поён ва татбиқи ҳамаи лоиҳаҳои инвеститсионӣ дар сатҳи баланд ба роҳ монда шавад; кори пурмаҳсули корхонаҳои саноатӣ дар мавсими фаровонии нерӯи барқ дар 3 баст таъмин гардад.
Президенти мамлакат Эмомалӣ Раҳмон ҳамчунин оид ба гузаштан ба истифодаи чароғҳои каммасраф, захираи маводи сӯхт дар муассисаҳои соҳаҳои маорифу тандурустӣ ва дигар масъалаҳои мавриди таваҷҷӯҳ ба масъулон дастуру ҳидоятҳо дод.
Панҷшанбе, 23 июли соли 2009. № 92 (21 599). Соли 85-уми нашр.
Баёни ақида (0) Санаи нашр: №: Мутолиа карданд: 3803
