энергетика
НИЁЗ БА БЕҲБУДӢ. ДАР БОРАИ ПАРДОХТИ ҲАҚҚИ ИСТИФОДАИ БАРҚ
Бино ба маълумоти шуъбаи саноат, коммуникатсия ва энергетикаи мақомоти иҷроияи ҳокимияти давлатии ВМКБ қарздории аҳолӣ ва идораву муассисаҳои вилоят аз ҳаққи истифодаи қувваи барқ дар назди ширкати “Помир энержи” ба 1 ноябри соли ҷорӣ қариб 5 миллион сомониро ташкил медиҳад, ки нисбат ба ҳамин давраи соли гузашта 1миллиону 300 ҳазор сомонӣ зиёд аст. Аз ин миқдор ба идораву муассисаҳои буҷавӣ бештар аз 2 миллион сомонӣ рост меояд. Қарздории ташкилотҳои тиҷоратӣ низ давоми сол 13 дарсад афзоиш ёфтааст. Қисми аъзами қарздориҳои ин бахш ба Корхонаи фаръии обу корези шаҳри Хоруғ тааллуқ дорад. Вале қарздории аҳолӣ дар назди ширкат нисбатан кам (34, 4 ҳазор сомонӣ) шуда бошад ҳам, дар маҷмӯъ аз як миллион мегузарад.
Ин дар ҳолест, ки давоми сол 91 дарсади истифодабарандагони неруи барқи вилоят, аз ҷумла сокинони шаҳри Хоруғ, ноҳияҳои Шуғнону Роштқалъа ва Ишкошиму Рӯшон (ба ғайр аз як қисми водии Бартанг), Дарвозу Ванҷ (ба истиснои водии Язгулом) дар давоми як шабонарӯз 24 соат ва 3 фоизи аҳолии вилоят – сокинони ноҳияи баландкӯҳи Мурғоб 8 - 12 соат бо барқ таъминанд.
Абдулло Амонбеков, менеҷери ширкат доир ба робита бо ҷомеа, иброз дошт, ки дар давоми сол тавассути 10 неругоҳи хурду миёнаи барқи обии вилоят бештар аз 150 миллион кВт, соат қувваи барқи аз лиҳози экологӣ тоза истеҳсол гардидааст. Ширкат ҳамчунин, таъминоти муштариёнро бо таҷҳизоти замонавии ченкунии сарфиёти барқ таҳти таваҷҷуҳи махсус қарор дода, дар миқёси вилоят аллакай 31 ҳазору 529 адад ҳисобкунакҳои электронӣ васл намуд. Айни ҳол бо 98 дарсади муштариёни ширкати барқии вилоят аз рӯи нишондоди ҳисобкунакҳои фардӣ ҳаҷми хароҷоти барқ ҳисоб карда шуда, танҳо сокинони як қисми водии Бартанги ноҳияи Рӯшон, водии Язгуломи ноҳияи Ванҷ ва муштариёни ноҳияи Мурғоб аз рӯи нишондоди ҳисобкунакҳои зеристгоҳҳо маблағи истифодаи қувваи барқро пардохт менамоянд. Ин боис гардид, ки муштариёни ширкат дар истифодаи қувваи барқ бештар сарфакориро ба роҳ монанд.
Бо вуҷуди ин дар пардохти ҳаққи истифодаи барқ дар вилоят мушкилот ҳанӯз боқӣ мемонад. Махсусан дар шаҳри Хоруғ вазъият нигаронкунанда аст. Аз наздики панҷ миллион сомонии қарздории муштариёни вилоят дар назди ширкат қариб 4 миллионаш ба муштариёни шаҳри Хоруғ, аз ҷумла 1,2 миллионаш ба идораҳои буҷавӣ, 1,6 миллион ба ташкилотҳои худмаблағгузору тиҷоратӣ ва қариб 1 миллион сомонӣ ба аҳолии шаҳр рост меояд. Дар ноҳияҳои Дарвоз ва Ванҷ низ вазъият беҳбудӣ металабад. Ин ҳолат мо, кормандони ширкатро водор месозад, ки бештар бо мардум кор барем, ба ҳамагон фаҳмонем, ки пардохти сари вақти ҳаққи истифодаи барқ барои кори боэътимоди неругоҳҳо дар тамоми сол мусоидат мекунад. Зеро маблағҳои аз ин манбаъ андӯхта барои таъмиру азнавсозии таҷҳизоти тавлиди барқи ширкат равона мегарданд. Сари вақт пардохт нагардидани ҳаққи истифодаи барқ ба кори мунтазами шабакаҳои барқӣ халал ворид месозад.
Раҳмони ГУЛЗОР, “Ҷумҳурият”
Баёни ақида (0) Санаи нашр: 1.12.2016 №: 236 Мутолиа карданд: 17221
