мулоқотҳо
СУҲБАТИ САРВАРИ ДАВЛАТ БО РАИСИ ПАЛАТАИ ВАКИЛОНИ ПАРЛУМОНИ ЧЕХИЯ
2 декабри соли 2016 масоили ҳамкории байнипарлумонии Тоҷикистону Чехия дар мулоқоти Асосгузори сулҳу ваҳдати миллӣ - Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон бо Раиси Палатаи вакилони Парлумони Ҷумҳурии Чехия Ян Ҳамачек баррасӣ шуданд.
Сарвари давлат Эмомалӣ Раҳмон таъкид доштанд, ки Тоҷикистону Чехия аз рӯзҳои нахустини ба роҳ мондани ҳамкорӣ самтҳои гуногун ва афзалиятнокро барои таҳкими муносибатҳо интихоб намудаанд ва ба густариши ҳамкориҳои байнипарлумонӣ низ таваҷҷуҳи хоса зоҳир карда мешавад.
Таъкид гардид, ки робитаҳои байнипарлумонӣ ба раванди мукаммал гардондани ҳамшарикии дуҷониба ва бисёрҷонибаи кишварҳои мо бо мазмуну мундариҷаи нав метавонанд дар сатҳи назаррас мусоидат намоянд.
Дар ин робита таъсиси Гурӯҳи парлумонӣ байни Маҷлиси намояндагони Маҷлиси Олии Ҷумҳурии Тоҷикистон ва Парлумони Ҷумҳурии Чехия яке аз омилҳои густариши ҳамкориҳои байнипарлумонӣ дар таҳкими робитаҳои Тоҷикистону Чехия маънидод карда шуд.
Дар ҷараёни мулоқот, инчунин мавзӯъҳои дигари равобити дуҷониба баррасӣ шуда, вобаста ба имконоти сармоягузорӣ, тиҷоратӣ ва молиявии Чехия ба раванди рушди ҳамкориҳои иқтисодии ду кишвар, аз ҷумла дар соҳаҳои гидроэнергетика, туризм ва технология нави коркарди маҳсулоти кишоварзӣ андешаронӣ сурат гирифт.
Муборизаи муштарак бар зидди таҳдидҳои ҷаҳони муосир, аз қабили терроризму экстремизм, гардиши ғайриқонунии маводи нашъаовар аз мавзӯъҳои дигари суҳбат буд, ки ҷонибҳо оид ба ҳалли онҳо табодули андеша карданд.
Баёни ақида (0) Санаи нашр: 5.12.2016 №: 238 Мутолиа карданд: 7609
