маориф
ДДСТ: ихтисоси «Бойгонишиносӣ»
таъсис ёфт
Аслиддин Низомӣ, ректори Донишкадаи давлатии санъати Тоҷикистон ба номи М.Турсунзода, дар нишасти матбуотӣ ба намояндагони воситаҳои ахбори омма гуфт, ки имсол донишкадаро 180 нафар хатм намуд, ки аз он 16 нафар соҳиби дипломи аъло гардид. Инчунин ҳама хатмкунандагон бо ҷойи кор таъмин шуданд.
Аз 887 донишҷӯи бахши рӯзона 80 нафар сессияи тобистонаро бо баҳои аъло ҷамъбаст кард. Дар Осорхонаи миллии ба номи Камолиддин Беҳзод беш аз 100 асари донишҷӯёни шӯъбаи рассомӣ бо номи «Баҳори истиқлол» 15 рӯз ба маърази тамошо гузошта шуд. Мутахассисон оид ба он ибрози ақида намуда гуфтанд, ки ин асарҳо ҷавобгӯи талаботи мактаби олии касбӣ мебошанд.
«Бузургдошти мерос ва рушди фарҳанги муосир» номи мавзӯи конференсияе буд, ки ба 1310-солагии Имоми Аъзам ва 18-солагии Истиқлолияти давлатии Тоҷикистон бахшида шуда буд.
Бо ин ном китоби алоҳидае низ ба табъ расид. Анъанаи қадимаи «Гули сурх» эҳё шуд. Дар аввали моҳи гузашта ба ин хотир бо иштироки олимону мутахассисон семинари илмӣ-амалӣ доир гардид.
Ду нафар донишҷӯи шӯъбаи режиссёрӣ дар Фестивали байналмилалии давлатҳои Осиёи Марказӣ дар шаҳри Алма-атои Ҷумҳурии Қазоқистон иштирок намуда, соҳиби дипломҳои ҷашнвора шуд. Се консерти ҳисоботии донишҷӯён тариқи шабакаҳои телевизионии кишвар намоиш ёфт.
Вобаста ба пурсиши хабарнигорон ректор гуфт, ки имсол 445 нафар довталаби арзандаро дар 14 ихтисос ба сафи донишҷӯӣ мепазиранд.
Ба шӯъбаи китобдорӣ ба таври илова боз 50 нафар қабул карда мешавад. Умуман, донишкада масъул аст, ки то ба истифода додани бинои нави Китобхонаи миллии кишвар 300 китобдорро тайёр кунад. Имсол ихтисоси нав бо номи «Бойгонишиносӣ» таъсис ёфт.
Абдулқодири Раҳим,
Фарзонаи Файзалӣ
Баёни ақида (0) Санаи нашр: №: Мутолиа карданд: 5672
