ҳуқуқ
ВАНҶ. ШАРҲИ ПАЁМ ВА ИСТИҚБОЛИ ГАРМИ СОКИНОН АЗ НИШОНДОДҲОИ ОН
Маълум аст, ки ҳар як ҷомеа бо такя ба неруи ақлонии худ ва инкишофи тафаккури миллии шаҳрвандонаш рушд мекунад, ки ин нукта дар Паёми имсолаи Президенти Ҷумҳурии Тоҷикистон, Пешвои миллат муҳтарам Эмомалӣ Раҳмон ба Маҷлиси Олӣ махсус таъкид гардид.
Бо мақсади шарҳу тавзеҳи ин ва дигар нуктаҳои Паёми Пешвои миллат муҳтарам Эмомалӣ Раҳмон дар ноҳияи Ванҷ силсилаи чорабиниҳо ба нақша гирифта шудаанд. Аз ҷумла, чанде пеш бо иштироки роҳбарони мақомоти ҳифзи ҳуқуқи ноҳия дар деҳоти Рованд, Техарв, Ҷовидон, Вотхуд, Язгулом ва ба номи Муҳаммадулло Абдуллоев вохӯриҳои судманд баргузор гардиданд. Прокурори ноҳия Муртазо Раҳмонзода зимни вохӯрӣ бо сокинони деҳоти водиҳои Ванҷи Боло ва Язгулом зикр кард, ки донистани санадҳои меъёрии ҳуқуқии амалкунанда, аз ҷумла қонунҳои Ҷумҳурии Тоҷикистон «Дар бораи масъулияти падару модар дар таълиму тарбияи фарзанд» ва «Дар бораи танзими анъана ва ҷашну маросимҳо дар Ҷумҳурии Тоҷикистон» барои тамоми қишри ҷомеа хеле муҳим ва зарур аст. Зикр гашт, ки дар натиҷаи саъю талоши мақомоти иҷроияи маҳаллии ҳокимияти давлатии ноҳия, Шӯрои ҳамоҳангсозии мақомоти ҳифзи ҳуқуқ, баргузорсозии семинару тадбирҳои фаҳмондадиҳӣ бо аҳли ҷомеа бисёр ҷавононе, ки дар хориҷи кишвар таҳсил мекарданд, ба Ватан баргаштанд. Вале, мутаассифона, ҳоло ҳам аз ноҳияи Ванҷ чанд нафар толибилм дар кишварҳои хориҷӣ таълимоти динии ғайриқонунӣ мегиранд.
Дар доираи мулоқоту вохӯриҳои роҳбарони ниҳодҳои амниятӣ, суд, милитсия бо сокинони деҳоти баландкӯҳ, ҳамчунин иҷрои саривақтии дастуру ҳидоятҳои Сарвари давлат, ки аз паёмашон ба Маҷлиси Олӣ бармеоянд, таъкид гардид. Масоили вобаста ба коҳиш додани сатҳи ҷинояткорӣ, пешгирии коррупсия, азхудкунии маблағҳо, дуздӣ ва талаву тороҷ кардани моликияти давлатӣ, фурӯши замин, аз таҳсил дур мондани наврасон ва дигар ҳодисаҳои номатлуб дар меҳвари таваҷҷуҳи иштирокдорон қарор гирифтанд.
Сироншоҳи ДИЛОВАР, «Ҷумҳурият»
Баёни ақида (0) Санаи нашр: 02.02.2017 №: 26 Мутолиа карданд: 3016
