порлумон
ДАФТАРИ НАМОЯНДАГӢ. ҲАМКОРИҲОИ ДУҶОНИБА ТАҲКИМ МЕЁБАНД
Таъсиси дафтари намояндагии Созмони озуқаворӣ ва кишоварзии Созмони Милали Муттаҳид дар Тоҷикистон ҳамкориҳои дуҷонибаро таҳким бахшида, ба ҷалби бештари сармоягузории институтҳои молиявӣ мусоидат хоҳад кард. Ин тасмим, ҳамчунин робитаи ниҳодҳои марбутаи давлатиро бо Созмони озуқаворӣ ва кишоварзӣ, шуъбаҳои минтақавии он, бахусус дар Аврупову Осиёи Марказӣ такони нав мебахшад.
Ин нуктаро Иззатулло Сатторӣ, вазири кишоварзии Ҷумҳурии Тоҷикистон, зимни муаррифии Созишнома байни Ҳукумати Ҷумҳурии Тоҷикистон ва Созмони озуқаворӣ ва кишоварзии Созмони Милали Муттаҳид оид ба таъсиси намояндагии ин сохтор дар Маҷлиси намояндагон иброз дошт.
Зикр шуд, ки созишномаи мавриди назар 6 майи соли 2016 дар конфронси 39 – уми минтақавии Созмони озуқаворӣ ва кишоварзии СММ ба имзо расид. Ташкилоти мазкур аз соли 1996 дар Тоҷикистон фаъолият намуда, дар ин муддат 89 лоиҳаи инвеститсиониро ба маблағи 37 миллион доллар дар бахшҳои илмиву таълимӣ, истеҳсолоти кишоварзӣ, мелиоратсияи замин ва об, паст кардани сатҳи камбизоатӣ ва бозомӯзии мутахассисон амалӣ намудааст. Он аз рӯи ҳафт лоиҳа, аз ҷумла оид ба дастрасӣ ба тухмиҳои баландсифат, идораи обёрӣ бо назардошти хизматрасонӣ, мубориза бар зидди малах, механиконии кишоварзӣ ва тақвияти иқтидори Вазорати кишоварзӣ фаъолият дорад.
Вакилони Маҷлиси намояндагони Маҷлиси Олии Ҷумҳурии Тоҷикистон 1 феврал, дар ҷаласаи навбатии Иҷлосияи сеюми МН МО даъвати панҷум ин созишномаро баррасӣ ва тасвиб намуданд.
Дар ҳамин ҷаласа лоиҳаи Қонуни Ҷумҳурии Тоҷикистон «Дар бораи ҳимояи рақобат», низ аз сӯи вакилон баррасӣ ва нисбат ба қабули он қарори дахлдор қабул гардид.
Иттилоъ дода шуд, ки Хадамоти зиддиинҳисории назди Ҳукумати Ҷумҳурии Тоҷикистон ҳамчун узви Шӯрои байнидавлатии Иттиҳоди Давлатҳои Мустақил лоиҳаи Қонуни Ҷумҳурии Тоҷикистон «Дар бораи ҳимояи рақобат»-ро бо назардошти таҷрибаи давлатҳои аъзои ИДМ таҳия намудааст. Вобаста ба ин дар лоиҳаи қонун меъёри ниҳоии ҳиссаи субъектҳои хоҷагидор дар бозори мол аз 25 то 15 дарсад тағйир дода шудааст. Ин аст, ки ба бовари коршиносон қабули лоиҳаи қонун ба тақвияти фаъолияти мақомоти зиддиинҳисорӣ ва танзими бозорҳои мол нақши муассир хоҳад гузошт.
Мунаввари САФАР, «Ҷумҳурият»
Баёни ақида (0) Санаи нашр: 03.02.2017 №: 27 Мутолиа карданд: 5211
