ҳуқуқ
ҚАЛЛОБӢ. БОЗДОШТИ КОРМАНДИ КОМИССАРИАТИ ҲАРБӢ БО ҶУРМИ ПОРАГИРӢ
Бо мақсади таъмини иҷрои Фармони Президенти Ҷумҳурии Тоҷикистон «Дар бораи Стратегияи муқовимат бо коррупсия дар Ҷумҳурии Тоҷикистон барои солҳои 2013 - 2020» ва Нақшаи чорабиниҳои Сарраёсати пешгирии коррупсия кормандони Агентии назорати давлатии молиявӣ ва мубориза бо коррупсия дар вазорату кумитаҳо, корхонаву ташкилотҳо, муассисаҳои таҳсилоти миёнаи умумӣ ва олии касбӣ мунтазам вохӯриву мулоқотҳои судманд доир менамоянд.
Мақсад аз гузарондани чунин вохӯриҳо пешгирии зуҳуроти номатлуб, аз қабили амалҳои коррупсионӣ, суистифода аз вазифа, гирифтани пора, қабули қарорҳои дорои хусусияти коррупсионидошта ва иҷрои бечунучарои талаботи қонунгузории зиддикоррупсионӣ ба шумор меравад.
Бо вуҷуди андешидани тадбирҳои муассир, ҳанӯз ҳам дар ҷомеа шахсоне пайдо мешаванд, ки дидаву дониста даст ба ҷиноятҳои коррупсионӣ мезананд. Чунонки сомонаи Агентии назорати давлатии молиявӣ ва мубориза бо коррупсия хабар медиҳад, як нафар корманди комиссариати ҳарбӣ бо ҷурми порагирӣ ба даст афтодааст. Гуфта мешавад, Илҳомҷон Боев, ки аз 17 июни соли 2016 дар вазифаи мутахассиси пешбари зершуъбаи сафарбарии мулкӣ дар Комиссариати ҳарбии шаҳри Истаравшан кор мекард, ҷинояти қаллобӣ содир намуд. Номбурда дар давраи фаъолияташ аз шаҳрванд И. Маҳкамов барои ба воситаи комиссияи давлатии тиббии Комиссариати ҳарбии шаҳри Истаравшан гирифта додани шаҳодатномаи муваққатан ғайри қобили хизмати ҳарбӣ будан, 1000 доллари амрикоӣ талаб кардааст.
Дар натиҷаи гузарондани чорабиниҳои фаврӣ - тафтишотӣ Илҳомҷон Боев дар ҳудуди шаҳри Истаравшан, баъди гирифтани 1000 доллар аз шаҳрванд И. Маҳкамов дар ҷойи ҳодиса дастгир гардида, далелҳои шайъӣ аз ӯ дарёфт ва гирифта шуданд.
Дар робита ба ин амал, нисбат ба ӯ бо моддаи 247 қисми 3, банди «а» Кодекси ҷиноятии Ҷумҳурии Тоҷикистон парвандаи ҷиноятӣ оғоз гардида, баъд аз тафтиши пешакӣ, бо тасдиқи фикри айбдоркунӣ барои моҳиятан баррасӣ намудан ба суд ирсол шудааст.
Сафаргул АЛИМОВА, «Ҷумҳурият»
Баёни ақида (0) Санаи нашр: 07.02.2017 №: 29 Мутолиа карданд: 3045